ວັນທີ 21 ກໍລະກົດນີ້ ຢູ່ຫໍຄຳທີ່ນະຄອນຫຼວງວຽງຈັນ ສປປ ລາວ, ທ່ານ ວາງເວີນທ່ຽນ ເອກອັກຄະລັດຖະທູດຈີນປະຈຳລາວໄດ້ຍື່ນສານຕາຕັ້ງໃຫ້ທ່ານ ບຸນຍັງ ວໍລະຈິດ ປະທານປະເທດລາວ.
ທ່ານ ວາງເວີນທ່ຽນ ໄດ້ຝາກຄວາມອວຍພອນອັນປະເສີດແລະຄວາມຢື້ຢາມຖາມຂ່າວຢ່າງຈິງໃຈຂອງທ່ານ ສີຈິ້ນຜິງ ປະທານປະເທດຈີນໄປຍັງທ່ານ ບຸນຍັງ ວໍລະຈິດ ປະທານປະເທດລາວ. ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບຕໍ່ທ່ານ ວາງເວີນທ່ຽນ ຂຶ້ນດຳລົງຕຳແໜ່ງເອກອັກຄະລັດຖະທູດຜູ້ໃໝ່ ພ້ອມທັງຂໍໃຫ້ທ່ານວາງເວີນທ່ຽນຝາກຄວາມຢື້ຢາມຖາມຂ່າວຂອງຕົນໄປຍັງທ່ານ ສີຈິ້ນຜິງ ປະທານປະເທດຈີນ.
ທ່ານ ບຸນຍັງ ວໍລະຈິດ ກ່າວວ່າ: ສາຍພົວພັນໄມຕີຈິດມິດຕະພາບແລະການຮ່ວມມືຮອບດ້ານລະຫວ່າງລາວກັບຈີນໄດ້ຮັກສາທ່າອ່ຽງແຫ່ງການພັດທະນາທີ່ດີມາໂດຍຕະຫຼອດ, ຝ່າຍລາວຮູ້ສຶກດີອົກດີໃຈຢ່າງຈິງໃຈຕໍ່ການຮ່ວມມືທີ່ແທ້ຈິງລະຫວ່າງສອງປະເທດໃນຂົງເຂດຕ່າງໆໃນຊຸມປີຜ່ານມາທີ່ໄດ້ຮັບຜົນສຳເລັດທີ່ອຸດົມສົມບູນ, ເຊື່ອໝັ້ນວ່າທ່ານເອກອັກຄະລັດຖະທູດວາງເວີນທ່ຽນຈະສາມາດປະກອບສ່ວນອັນໃຫຍ່ຫຼວງກວ່າເກົ່າຕໍ່ການຂະຫຍາຍສາຍພົວພັນລະຫວ່າງສອງຝ່າຍໃນໄລຍະປະຕິບັດໜ້າທີ່ຕຳແໜ່ງ.
ທ່ານ ວາງເວີນທ່ຽນ ກ່າວວ່າ: ປັດຈຸບັນ, ສາຍພົວພັນລະຫວ່າງສອງປະເທດພວມຢູ່ໃນໄລຍະທີ່ດີທີ່ສຸດໃນປະຫວັດສາດ, ແມ່ນປະເທດໃກ້ຄຽງທີ່ດີ,ເພື່ອນມິດທີ່ດີ,ສະຫາຍທີ່ດີແລະຄູ່ຮ່ວມທີ່ດີຢ່າງແທ້ຈິງ. ທ່ານຈະຮ່ວມກັບຝ່າຍລາວຮ່ວມກັນພະຍາຍາມເລັ່ງລັດຈັດຕັ້ງປະຕິບັດຄວາມຮັບຮູ້ທີ່ສຳຄັນຢ່າງເປັນເອກະພາບລະຫວ່າງຜູ້ນຳຂອງສອງປະເທດ,ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງຝ່າຍໃຫ້ກ້າວຂຶ້ນສູ່ລະດັບໃໝ່ໃນຍຸກໃໝ່ຢ່າງບໍ່ຢຸດຢັ້ງ.
ທ່ານ ວາງເວີນທ່ຽນ ໄດ້ເດີນທາງໄປຮອດນະຄອນຫຼວງວຽງຈັນແລະເລີ່ມດຳລົງຕຳແໜ່ງເອກອັກຄະລັດຖະທູດຈີນປະຈຳລາວໃນວັນທີ 14 ກໍລະກົດນີ້.
