ສະພາສູງແລະສະພາຕ່ຳຟີລິບປິນໄດ້ຈັດກອງປະຊຸມຮ່ວມໃນວັນທີ 22 ກໍລະກົດນີ້ໂດຍໄດ້ຮັບຮອງເອົາຍັດຕິຂອງທ່ານປະທານາທິບໍດີໂຣດຣີໂກ ດູເຕີເຕວ່າດ້ວຍການແກ່ຍາວການໃຊ້ກົດໄອຍະການເສິກຢູ່ພາກໃຕ້ປະເທດຕົນໄປເຖິງທ້າຍປີ 2017 ນີ້ດ້ວຍຄະແນນສຽງເຫັນດີສ່ວນຫຼາຍ. ຕາມຍັດຕິດັ່ງກ່າວ, ເກາະມິນດານາວແລະແຫ່ງອື່ນໆຢູ່ພາກໃຕ້ຟີລິບປິນຈະແກ່ຍາວການໃຊ້ກົດໄອຍະການເສິກເປັນເວລາ 60 ວັນທີ່ເລີ່ມປະຕິບັດມາແຕ່ວັນທີ 23 ພຶດສະພາຜ່ານມານັ້ນອອກໄປເຖິງວັນທີ 31 ທັນວາປີ 2017 ນີ້.
ໂຄສົກທຳນຽບປະທານາທິບໍດີຟີລິບປິນອອກຖະແຫຼງການໃນວັນທີ 22 ກໍລະກົດນີ້ວ່າ: ປັດຈຸບັນ, ການສູ້ຮົບຢູ່ເມືອງມາລາວີຍັງບໍ່ທັນສິ້ນສຸດເທື່ອ ແລະຍັງຕ້ອງເຮັດວຽກຫຼາຍຢ່າງເພື່ອຟື້ນຟູຄວາມໝັ້ນຄົງ,ກົດໝາຍແລະຄວາມເປັນລະບຽບຮຽບຮ້ອຍທາງສັງຄົມຂອງທົ່ວເກາະມິນດານາວ. ຈາກນີ້, ປະຊາຊົນທົ່ວທັງຊາດຟີລິບປິນຄວນສາມັກຄີເປັນຈິດໜຶ່ງໃຈດຽວກັນເພື່ອເຮັດໃຫ້ເກາະມິນດານາວບັນລຸ ຄວາມສະຫງົບຖາວອນ ແລະສ້າງໃຫ້ເປັນບ້ານເມືອງທີ່ສວຍງາມຮັ່ງມີ.
ຂະນະດຽວກັນ, ກອງທັບຟີລິບປິນໄດ້ອອກຖະແຫຼງການວ່າ: ລັດຖະສະພາຜ່ານຮັບຮອງຍັດຕິວ່າດ້ວຍການແກ່ຍາວການໃຊ້ກົດໄອຍະການເສິກນັ້ນເປັນການສະໜັບສະໜູນຕໍ່ການສູ້ຮົບຂອງກອງທັບຢູ່ເມືອງມາລາວີ ທັງເນັ້ນວ່າ ປັດຈຸບັນ ກອງທັບຍັງຄົງຜະເຊີນກັບສິ່ງທ້າທາຍຈຳນວນບໍ່ໜ້ອຍຢູ່ເມືອງດັ່ງກ່າວ.
ວັນທີ 23 ພຶດສະພາຜ່ານມາ, ກອງທັບຟີລິບປິນແລະກຸ່ມມາວເຕ, ກຸ່ມອາບູຊາຢັບ ເຊິ່ງເປັນກຸ່ມປະກອບອາວຸດຕໍ່ຕ້ານລັດຖະບານ ໄດ້ຍິງປະທະກັນຢູ່ມາລາວີ ເມືອງພາກໃຕ້ປະເທດດັ່ງກ່າວ, ມື້ດຽວກັນ, ທ່ານດູເຕີເຕໄດ້ປະກາດໃຊ້ກົດໄອຍະການເສິກເປັນເວລາ 60 ວັນຢູ່ເກາະມິນດານາວແລະ ອື່ນໆທາງພາກໃຕ້ປະເທດຕົນ. ການສູ້ຮົບທີ່ຍັງສືບຕໍ່ຢູ່ທ້ອງຖິ່ນດັ່ງກ່າວໃນປັດຈຸບັນໄດ້ເຮັດໃຫ້ມີຜູ້ເສຍຊີວິດຫຼາຍກວ່າ 550 ຄົນ, ນອກນີ້, ປະຊາຊົນທ້ອງຖິ່ນດັ່ງກ່າວ 4 ແສນ 6 ໝື່ນ 5000 ຄົນຈຳຕ້ອງໜີຈາກບ້ານເມືອງເພື່ອລີ້ໄພສົງຄາມ.