ສື່ມວນຊົນອີຣານລາຍງານໃນວັນທີ 23 ກໍລະກົດນີ້ວ່າ: ກະຊວງການຕ່າງປະເທດອີຣານໄດ້ອອກຖະແຫຼງການໂດຍຕຳໜິວ່າ ການທີ່ທ່ານໂດນັນ ທຣຳ ປະທານາທິບໍດີອາເມລິກາຮຽກຮ້ອງໃຫ້ອີຣານປ່ອຍ ພົນລະເມືອງອາເມລິກາທີ່ຖືກຈັບກຸມນັ້ນເປັນການແຊກແຊງວຽກງານພາຍໃນເຊິ່ງ ອີຣານຮັບເອົາບໍ່ໄດ້ຢ່າງເດັດຂາດ.
ຂ່າວສານຕາສນິມອີຣານໄດ້ລາຍງານໂດຍອ້າງຕາມການເປີດເຜີຍຂອງທ່ານບາຣາມ ຄາເຊມີ ໂຄສົກກະຊວງການຕ່າງປະເທດອີຣານໃນວັນທີ 23 ກໍລະກົດນີ້ລາຍງານວ່າ: ຜູ້ທີ່ເປັນໄພອັນຕະລາຍຕໍ່ຄວາມໝັ້ນຄົງແຫ່ງຊາດ ແລະລະເມີດກົດໝາຍຂອງອີຣານຈະຖືກລົງໂທດຕາມກົດໝາຍຂອງປະເທດຕົນ ໂດຍຈະບໍ່ໄດ້ຮັບຜົນສະທ້ອນຈາກຖະແຫຼງການແບບແຊກແຊງແລະຂົ່ມຂູ່.
ທ່ານຄາເຊມີຢືນຢັນວ່າ ຂະບວນການຕຸລະການອີຣານມີຄວາມເປັນອິດສະຫຼະ ແລະມີໜ້າທີ່ຮັບຜິດຊອບແກ້ໄຂການກະທຳທີ່ເປັນການຂົ່ມຂູ່ຄວາມໝັ້ນຄົງແຫ່ງຊາດອີຣານ.ການກະທຳຕ່າງໆຂອງອາເມລິກາເປັນການກະທຳທີ່ຜິດພາດແລະຜິດກົດໝາຍ.
ໂຄສົກຂະແໜງການຕຸລາການອີຣານຢືນຢັນໃນວັນທີ 16 ກໍລະກົດນີ້ວ່າ: ພົນລະເມືອງອາເມລິກາຜູ້ໜຶ່ງຖືກສານອີຣານຕັດສິນຕັດອິດສະຫຼະພາບເປັນເວລາ 10 ປີເນື່ອງຈາກເປັນນັກສືບສອດແນມ. ແຕ່ປີ 2016 ເປັນຕົ້ນມາ, ມີພົນລະເມືອງ ອາເມລິກາ,ອັງກິດ,ການາດາ,ໂອຕຣິສ, ຝະຮັ່ງຫຼາຍຄົນຖືກຈັບຢູ່ອີຣານແລະຖືກກ່າວຟ້ອງໃນຂໍ້ຫາສອດແນມຫຼືຮ່ວມມືກັບລັດຖະບານປະເທດທີ່ເປັນປໍລະປັກ.