ທາງການໄທເປີດເຜີຍຂໍ້ມູນການຄ້າຫຼ້າສຸດວ່າ, ມູນຄ່າການສົ່ງອອກສິນຄ້າໃນເດືອນມິຖຸນາຜ່ານມາ ໄດ້ເພີ່ມຂຶ້ນ 11,7% ເມື່ອທຽບໃສ່ເດືອນພຶດສະພາຜ່ານມາ ສົ່ງຜົນເຮັດໃຫ້ມູນຄ່າສົ່ງອອກຂອງປະເທດຕົນໃນ 6 ເດືອນຕົ້ນປີນີ້ ບັນລຸເຖິງ 113 ຕື້ 547 ລ້ານໂດລາສະຫະລັດ ເພີ່ມຂຶ້ນ 7,8%.
ກະຊວງການຄ້າໄທໃຫ້ຮູ້ວ່າ, ການທີ່ມູນຄ່າການສົ່ງອອກເພີ່ມຂຶ້ນນັ້ນ ຕົ້ນຕໍຍ້ອນເສດຖະກິດທົ່ວໂລກຟື້ນຟູ ໂດຍສະເພາະການປະກອບສ່ວນຂອງຕະຫຼາດປະເທດຄູ່ຮ່ວມການຄ້າຕົ້ນຕໍ ໃນນັ້ນ, ຕະຫຼາດຈີນເພີ່ມຂຶ້ນເກືອບ 30% ພ້ອມທັງຍີ່ປຸ່ນແລະ 5 ປະເທດໃນອາຊຽນ ກໍໄດ້ເພີ່ມຂຶ້ນຫຼາຍກວ່າ 20%.
ກະຊວງການຄ້າໄທເຫັນວ່າ, ເນື່ອງຈາກເສດຖະກິດທົ່ວໂລກຟື້ນຟູ ຈຶ່ງເຊື່ອວ່າໃນ 6 ເດືອນທ້າຍປີນີ້, ຄາດວ່າການສົ່ງອອກ ຈະສືບຕໍ່ຢູ່ໃນທ່າດີຄື 6 ເດືອນຕົ້ນປີນີ້. ແນວໃດກໍດີ, ກໍໄດ້ຕັ້ງເປົ້າໝາຍການສົ່ງອອກໝົດປີນີ້ໃຫ້ເພີ່ມຂຶ້ນຢູ່ໃນລະດັບ 5%.