ສັນນິບາດອາຣັບ ໄດ້ອອກຖະແຫຼງການໃນວັນທີ 23 ກໍລະກົດນີ້ວ່າ, ອົງການຕົນຈະໄຂກອງປະຊຸມດ່ວນລະດັບລັດຖະມົນຕີໃນວັນທີ 26 ເດືອນນີ້ ເພື່ອຫາລືສະຖານະການໃນໄລຍະນີ້ລະຫວ່າງປາແລັສຕິນ-ອິສລາແອນ.
ຖະແຫຼງການລະບຸວ່າ, ໂດຍຕອບສະໜອງຄວາມຮ້ອງຂໍຂອງປະເທດຊອກດານີ ແລະໄດ້ຮັບການສະໜັບສະໜູນຈາກຫຼາຍປະເທດສະມາຊິກ, ອົງການຕົນຈຶ່ງຕົກລົງຈະໄຂກອງປະຊຸມລັດຖະມົນຕີການຕ່າງປະເທດຂອງສະພາມົນຕີໃນຕອນບ່າຍວັນທີ 26 ເດືອນນີ້ ເພື່ອຫາລືເຫດການປະທະກັນທີ່ເກີດຂຶ້ນຢູ່ເຢລູຊາແລັມແລະມາດຕະການຮັບມືຂອງລັດຖະບານອິສລາແອນ.
ທ່ານ ອາເຮີມັດ ອັບດູນ ເກດ ເລຂາທິການໃຫຍ່ສັນນິບາດອາຣັບ ອອກຖະແຫຼງການໃນມື້ດຽວກັນວ່າ, ມາດຕະການຂອງລັດຖະບານອິສລາແອນ ບໍ່ກ່ຽວຂ້ອງກັບຄວາມໝັ້ນຄົງ ເຊິ່ງຈະເຮັດໃຫ້ເກີດວິກິດການຢ່າງໃຫຍ່ຫຼວງລະຫວ່າງໂລກອາຣັບກັບມຸສລິມ.
ຂ່າວແຈ້ງວ່າ, ວັນທີ 14 ກໍລະກົດນີ້, ຕຳຫຼວດອິດສະລາແອນ 3 ຄົນຖືກຍິງຢູ່ນອກພູວັດເຢລູຊາແລັມ ເຊິ່ງຊາວມຸສລິມເອີ້ນວ່າ ສະຖານທີ່ສັກສິດ ໂດຍໃນນັ້ນ, ມີສອງຄົນເສຍຊີວິດ. ຫຼັງຈາກນັ້ນ, ອິດສະລາແອນກໍໄດ້ຕັນເຂດເກີດເຫດ ແລະຫ້າມບໍ່ໃຫ້ຊາວມຸສລິມໄປນະມັດສະການຢູ່ສຸເຫຼົ່າ. ຈົນມາຮອດວັນທີ 16 ເດືອນດຽວກັນ, ຕຳຫຼວດອິສລາແອນ ໄດ້ເປີດປະຕູສຸເຫຼົ່າອິສລາມອັກຊາທີ່ຢູ່ພູວັດ ແລະໄດ້ຕິດຕັ້ງເຄື່ອງກວດວັດຖຸແລະກ້ອງວົງຈອນປິດຢູ່ໜ້າປະຕູ. ເຖິງຢ່າງໃດກໍດີ, ຊາວມຸສລິມຍັງບໍ່ພໍໃຈຕໍ່ການກະທຳຂອງອິສລາແອນ ໂດຍໄດ້ປະທ້ວງຢ່າງຕໍ່ເນື່ອງ ຈົນເກີດການປະທະກັນ ເຊິ່ງເຮັດໃຫ້ຢ່າງໜ້ອຍ 10 ຄົນເສຍຊີວິດ ແລະຫຼາຍກວ່າ 500 ຄົນບາດເຈັບ.