Standard & Poor's ເຊິ່ງເປັນບໍລິສັດປະເມີນອັນດັບຂອງໂລກ ໄດ້ປະກາດຜົນການປະເມີນຂັ້ນສິນເຊື່ອອັດຕະພາບໄລຍະຍາວ AAA ແລະໄລຍະສັ້ນ A-1+ ໃຫ້ທະນາຄານລົງທຶນພື້ນຖານໂຄງລ່າງອາຊີ ຫຼື AIIB ແລະຄາດວ່າໃນອະນາຄົດຈະໜັກແໜ້ນເຂັ້ມແຂງຍິ່ງຂຶ້ນ.
ບໍລິສັດ S&P ເຫັນວ່າ, ທະນາຄານ AIIB ໄດ້ລົງທຶນຫຼາຍຢູ່ທະວີບອາຊີ ເຊິ່ງຖານະສຳຄັນຂອງອົງການນີ້ໄດ້ຮັບການຄ້ຳປະກັນຈາກຄວາມຕ້ອງການການລົງທຶນພື້ນຖານໂຄງລ່າງຢ່າງແຂງແຮງຂອງພາກພື້ນອາຊີ. ຂະນະທີ່ໃນ 3-5 ປີຕໍ່ໜ້າ, ທະນາຄານດັ່ງກ່າວຈະເສີມສ້າງຄວາມສາມາດດຳເນີນທຸລະກິດຢ່າງພົ້ນເດັ່ນ ແລະຈາກນັ້ນກໍຈະສະໜັບສະໜູນຜົນການປະເມິນຂັ້ນ "ດີຫຼາຍ" ດ້ານສະພາບທຸລະກິດ ແລະ "ເຂັ້ມແຂງຫຼາຍ" ດ້ານສະພາບການເງິນ.
ບໍລິສັດ S&P ກ່າວວ່າ, ການສະໜັບສະໜູນຢ່າງແຂງແຮງຈາກຂາຫຸ້ນ ແມ່ນປັດໄຈສຳຄັນໃນການຄ້ຳປະກັນການປະເມີນສະພາບທຸລະກິດຂອງທະນາຄານດັ່ງກ່າວ ແລະການທີ່ 80 ປະເທດແລະເຂດແຄວ້ນເຊິ່ງລວມທັງ 17 ປະເທດໃນກຸ່ມ 20 ປະເທດສະໜັບສະໜູນອົງການທີ່ສ້າງຕັ້ງຂຶ້ນໃໝ່ດ້ວຍເງິນທຶນກ້ອນໃຫຍ່ນັ້ນ ກໍໄດ້ສະແດງໃຫ້ເຫັນຢ່າງແຮງກ້າວ່າ ທະນາຄານດັ່ງກ່າວຈະໄດ້ຮັບການສະໜັບສະໜູນຢ່າງຕໍ່ເນື່ອງໃນອະນາຄົດ.