ວັນທີ 24 ກໍລະກົດນີ້, ທ່ານ ມາວຣາຍສ໌ ໂອບສ໌ດ໌ເຟວດ໌ ຫົວໜ້ານັກເສດຖະສາດຂອງອົງການກອງທຶນເງິນຕາສາກົນຫຼື IMF ກ່າວໃນຂະນະໃຫ້ສຳພາດຕໍ່ນັກຂ່າວວ່າ: ເສດຖະກິດຈີນໄດ້ຮັກສາການເຕີບໂຕທີ່ເຂັ້ມແຂງແລະມີຄວາມໝັ້ນທ່ຽງນັ້ນມີຄວາມສຳຄັນຫຼາຍຕໍ່ເສດຖະກິດໂລກ ແລະຈາກນີ້, ຈີນຈະສືບຕໍ່ເປັນກຳລັງສຳຄັນໃນການຊຸກຍູ້ການເຕີບໂຕຂອງເສດຖະກິດໂລກ.
ທ່ານ ໂອບສ໌ດ໌ເຟວດ໌ ເຫັນວ່າ: ການເຕີບໂຕຂອງເສດຖະກິດຈີນໃນຫົກເດືອນຕົ້ນປີນີ້ມີຄວາມເຂັ້ມແຂງຫຼາຍ ໂດຍສະເພາະຄວາມໄວຂອງການເຕີບໂຕໃນໄຕມາດທີສອງປີນີ້ບັນລຸເຖິງ 6,9% ເຊິ່ງຫຼາຍກວ່າການຕັ້ງເປົ້າເຊັ່ນດຽວກັນ.
ທ່ານ ໂອບສ໌ດ໌ເຟວດ໌ ກ່າວຕື່ມວ່າ: ຈີນພວມດຳເນີນການປະຕິຮູບໂຄງປະກອບເສດຖະກິດ,ຫັນເປັນຮູບແບບການພັດທະນາທີ່ຖືຂະແໜງການບໍລິການເປັນຫຼັກ,ການບໍລິໂພກເປັນກຳລັງຊຸກຍູ້. ເຊິ່ງເມື່ອເວົ້າໃນທົ່ວໂລກແລ້ວ, ສິ່ງທີ່ສຳຄັນບໍ່ພຽງແຕ່ແມ່ນການຮັກສາຕົວເລກການເຕີບໂຕທີ່ເຂັ້ມແຂງເທົ່ານັ້ນ, ຫາກຍັງແມ່ນຍ້ອນການເຕີບໂຕດ້ວຍຮູບແບບທີ່ໝັ້ນທ່ຽງແລະແບບຍືນຍົງຂອງຈີນ.
ທ່ານ ໂອບສ໌ດ໌ເຟວດ໌ ສະແດງຄວາມຊົມເຊີຍທີ່ຈີນໄດ້ສຸມທຸກຄວາມພະຍາຍາມຊຸກຍູ້ໂລກາພິວັດ ຄືການສ້າງ "ໜຶ່ງແລວທາງໜຶ່ງເສັ້ນທາງ" ເຊິ່ງນອກຈາກບໍ່ພຽງແຕ່ຫວັງດຶງດູດການລົງທຶນດ້ານພື້ນຖານໂຄງລ່າງຢ່າງຫຼວງຫຼາຍເທົ່ານັ້ນ,ຫາກຍັງສາມາດຫຼຸດຕົ້ນທຶນການຄ້າເຊິ່ງກັນແລະກັນໄດ້ ແລະຊຸກຍູ້ການພັດທະນາການຄ້າສາກົນ.