ວັນທີ 24 ກໍລະກົດນີ້, ທ່ານ ເຊ້ຍສຽວຢຽນ ທູດພິເສດກ່ຽວກັບບັນຫາຊີຣີຂອງລັດຖະບານຈີນກ່າວວ່າ: ສະຖານະການຊີຣີໃນປັດຈຸບັນໄດ້ປ່ຽນແປງທີ່ສຳຄັນໃນໄລຍະໃດໜຶ່ງ ເຊິ່ງຝ່າຍຕ່າງໆທີ່ກ່ຽວຂ້ອງຄວນໃຊ້ໂອກາດແລະຄວາມຄືບໜ້າທີ່ເປັນປະໂຫຍດໂດຍການນັ່ງໂຕະເຈລະຈາແລະຫາລືກ້າວສູ່ຄວາມເປັນເອກະພາບ ເພື່ອສ້າງພື້ນຖານທີ່ໜັກແໜ້ນໃຫ້ແກ່ການແກ້ໄຂບັນຫາຊີຣີດ້ວຍວິທີທາງການເມືອງ.
ໂດຍເຫັນໄດ້ຄວາມເປັນເອກະພາບກ່ຽວກັບບັນຫາຊີຣີຮອບຜ່ານມາທີ່ຈະສ້າງ"ເຂດຫຼຸດລະດັບຂອງການປະທະກັນ"ຫຼັງເຈລະຈາສັນຕິພາບຢູ່ອັສຕານາ, ທ່ານ ເຊ້ຍສຽວຢຽນ ກ່າວວ່າ: ນີ້ແມ່ນຂັ້ນຕອນທີ່ຕັ້ງໜ້າ ເຊິ່ງຈີນສະແດງຄວາມຊົມເຊີຍໃນເລື່ອງນີ້. ແນວໃດກໍດີ, ການສ້າງ"ເຂດຫຼຸດລະດັບຂອງການປະທະກັນ"ພຽງແຕ່ແມ່ນການກຳນົດຊົ່ວຄາວແລະໄລຍະໃດໜຶ່ງເທົ່ານັ້ນ ເຊິ່ງເປົ້າໝາຍຕົ້ນຕໍກໍຄືການສ້າງຜົນດີຕໍ່ການຮັກສາສະພາບການຢຸດຍິງ ລວມທັງຊຸກຍູ້ຂະບວນການແກ້ໄຂບັນຫາດ້ວຍວິທີທາງການເມືອງ.
ທ່ານ ເຊ້ຍສຽວຢຽນ ເນັ້ນວ່າ: ຈີນແມ່ນໜຶ່ງໃນບັນດາປະເທດທີ່ສະໜັບສະໜູນການແກ້ໄຂບັນຫາຊີຣີດ້ວຍວິທີທາງການເມືອງມາໂດຍຕະຫຼອດ ເຊິ່ງເປັນຫຼັກໝັ້ນທີ່ບໍ່ປ່ຽນແປງ. ຂະນະດຽວກັນກໍຈະສືບຕໍ່ຍຶດໝັ້ນການນຳເອົາສັນຕິພາບແລະຊຸກຍູ້ການເຈລະຈາ,ຊຸກຍູ້ການບັນລຸການຢຸດຍິງ,ການຊ່ວຍເຫຼືອມະນຸດສະທຳແລະການຮ່ວມກັນຕ້ານການກໍ່ການຮ້າຍຢ່າງສຸດຂີດ.