ວັນທີ 24 ກໍລະກົດນີ້ ຢູ່ນະຄອນຫຼວງບາງກອກປະເທດໄທ, ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທໄດ້ຕ້ອນຮັບການເຂົ້າຢ້ຽມຄຳນັບຂອງທ່ານວາງຢີ້ ລັດຖະມົນຕີກະຊວງການຕ່າງປະເທດຈີນ.
ທ່ານປຣະຍຸດກ່າວວ່າ, ນັບແຕ່ຈີນແລະໄທສ້າງສາຍສຳພັນທາງການທູດເປັນຕົ້ນມາ, ກາຍພົວພັນລະຫວ່າງສອງປະເທດໄດ້ຂະຫຍາຍຕົວຢ່າງໜັກແໜ້ນ ແລະໄດ້ຮັບໝາກຜົນພົ້ນເດັ່ນ. ທີ່ສຳຄັນ ເວລາໃດໄທກໍຍຶດໝັ້ນຫຼັກການປະເທດຈີນດຽວ ແລະຍິນດີລົງເລິກການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຕື່ມອີກ, ຂະນະດຽວກັນກໍຂໍສະແດງຄວາມຊົມເຊີຍຜົນສຳເລັດໃນການພັດທະນາຂອງຈີນ ແລະຫວັງຈະໄດ້ບົດຮຽນການບໍລິຫານປະເທດແລະຄຸ້ມຄອງລັດຈາກຈີນ. ພ້ອມກັນຈະເຮັດໃຫ້ "ຍຸດທະສາດການພັດທະນາ 4.0 ຂອງໄທ" ເຊື່ອມຕໍ່ກັບ "ການຜະລິດຂອງຈີນ 2025" ເພື່ອລົງເລິກການຮ່ວມມືລະຫວ່າງສອງປະເທດ ພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ"ໃຫ້ເປັນຈິ່ງ. ສ່ວນໂຄງການທາງລົດໄຟຈີນ-ໄທ, ລັດຖະບານໄທໄດ້ສະໜັບສະໜູນແລະຍິນດີຕ້ອນຮັບວິສາຫະກິດຈີນເຂົ້າຮ່ວມການສ້າງແລວທາງເສດຖະກິດພາກຕາເວັນອອກຂອງໄທ ແລະຫວັງໃຫ້ການຮ່ວມມືລະຫວ່າງສອງປະເທດສາມາດຊຸກດັນການພັດທະນາຂອງທົ່ວອະນຸພາກພື້ນ.
ທ່ານວາງຢີ້ກ່າວວ່າ, ຈີນເອົາໃຈໃສ່ສູງຕໍ່ມິດຕະພາບຈີນ-ໄທຢ່າງສະເໝີຕົ້ນສະເໝີປາຍ, ສະແດງຄວາມຊົມເຊີຍໄທທີ່ສະໜັບສະໜູນ ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທັງຍິນດີເຊື່ອມຍຸດທະສາດການພັດທະນາສອງປະເທດພາຍໃຕ້ຂໍ້ລິເລີ່ມດັ່ງກ່າວ. ຂະນະດຽວກັນກໍຈະເປີດກວ້າງຂົງເຂດການຮ່ວມມື, ຊຸກຍູ້ໂຄງການທາງລົດໄຟຈີນ-ໄທ, ເຂົ້າຮ່ວມການສ້າງສາແລວທາງເສດຖະກິດພາກຕາເວັນອອກຂອງໄທ ເພື່ອຂຸດຄົ້ນຄວາມສາມາດບົ່ມຊ້ອນແລະບັນທຶກເນື້ອໃນໃໝ່ແຫ່ງການພົວພັນລະຫວ່າງສອງປະເທດ. ພ້ອມນີ້ຈີນກໍຍິນດີສືບຕໍ່ເພີ່ມທະວີການແລກປ່ຽນແລະປະສານງານກັບໄທໃນຂອບການຮ່ວມມືຈີນ-ອາຊຽນ ກໍຄືວຽກງານພາກພື້ນແລະສາກົນຕື່ມອີກ.
 |
