ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ກ່າວໃນໂອກາດຖະແຫຼງຂ່າວຮ່ວມກັບທ່ານ ດອນ ປຣະມັດວິໄນ ລັດຖະມົນຕີກະຊວງການຕ່າງປະເທດໄທຢູ່ນະຄອນຫຼວງບາງກອກໃນວັນທີ 24 ກໍລະກົດນີ້ວ່າ, ທາງລົດໄຟຈີນ-ໄທ ແມ່ນໂຄງການການຮ່ວມມືສຳຄັນເຊິ່ງຕ່າງຝ່າຍຕ່າງກໍມີຜົນປະໂຫຍດຮ່ວມ ແລະກໍແມ່ນໂຄງການເຊື່ອມຈອດທີ່ສຳຄັນພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ".
ທ່ານ ວາງຢີ້ ກ່າວຕື່ມວ່າ, ການກໍ່ສ້າງທາງລົດໄຟຈີນ-ໄທ ບໍ່ພຽງແຕ່ມີຜົນດີຕໍ່ຄວາມຈະເລີນຮຸ່ງເຮືອງແລະການພັດທະນາອຸດສາຫະກຳຢູ່ລຽບຕາມເສັ້ນທາງຂອງໄທເທົ່ານັ້ນ, ຍັງຈະເປັນການບຸກທະລຸສ້າງຕາໜ່າງທາງລົດໄຟຜ່ານອາຊີ ແລະເຮັດໃຫ້ໄທກາຍເປັນໃຈກາງເຊື່ອມຈອດຂອງພາກພື້ນ ແລະໃຈກາງເສດຖະກິດທີ່ສຳຄັນຂອງອາຊຽນອີກດ້ວຍ. ສະນັ້ນ, ບໍ່ວ່າເບິ່ງຈາກພາຍໃນປະເທດ ຫຼືພາກພື້ນແລ້ວ, ໂຄງການດັ່ງກ່າວ ລ້ວນແຕ່ມີຜົນດີຕໍ່ການພັດທະນາໃນໄລຍະຍາວຂອງໄທ ແລະສອດຄ່ອງກັບຜົນປະໂຫຍດຕົວຈິງຂອງປະຊາຊົນໄທ.
ທ່ານ ວາງຢີ້ ກ່າວໂດຍຍົກໃຫ້ເຫັນສຸພາສິດຈີນທີ່ວ່າ "ເລື່ອງດີຈະພົບຄວາມຫຍຸ້ງຍາກຫຼາຍກ່ອນຈະສຳເລັດ." ໂຄງການທາງລົດໄຟຈີນ-ໄທ ກໍຫຼີກບໍ່ໄດ້ທີ່ຈະພົບຄວາມຫຍຸ້ງຍາກຈຳນວນໜຶ່ງ. ແນວໃດກໍດີ, ກ່ອນໜ້ານີ້ບໍ່ດົນ, ຈາກການຊຸກຍູ້ຂອງທ່ານ ປຣະຍຸດ ຈັນໂອຊາ ນາຍົກລັດຖະມົນຕີໄທ, ການເຈລະຈາໂຄງການດັ່ງກ່າວ ສາມາດຜ່ານຜ່າຄວາມຫຍຸ້ງຍາກດ້ານເຕັກນິກ ໂດຍຖືວ່າມີຄວາມຄືບໜ້າທີ່ສຳຄັນ. ຂະນະດຽວກັນ, ສອງຝ່າຍຍັງໄດ້ກຳນົດແຜນການຮ່ວມມືນຳອີກ ລວມທັງເວລາລົງມືກໍ່ສ້າງເປັນຕົ້ນ ແລະຫວັງວ່າຈະບັນລຸຜົນເປັນຈິງຕາມກຳນົດ. ເພື່ອບັນລຸຜົນສຳເລັດ, ຈີນຍິນດີແບ່ງປັນເຕັກນິກທາງລົດໄຟຄວາມໄວສູງໃຫ້ໄທໃນຂະບວນການກໍ່ສ້າງ, ຊ່ວຍໄທຍົກລະດັບຊັບພະຍາກອນມະນຸດດ້ານວິຊາສະເພາະແລະການຄຸ້ມຄອງທີ່ມີຄຸນນະພາບ.
 |
