ພະຍາດໄຂ້ຫວັດໃຫຍ່ H1N1 ສາຍ A ໄດ້ລະບາດຢູ່ອິນເດຍອີກເທື່ອໃໝ່ໃນປີນີ້ ໂດຍການລາຍງານຂອງໜັງສືພິມອິນເດຍແທັມສ໌ ສະບັບວັນທີ 24 ກໍລະກົດນີ້ວ່າ, ມາຮອດປັດຈຸບັນ, ທົ່ວປະເທດໄດ້ຮັບການລາຍງານຜູ້ຕິດພະຍາດດັ່ງກ່າວເກືອບ 12.500 ຄົນ, ໃນນີ້ມີຜູ້ເສຍຊີວິດປະມານ 600 ຄົນ.
ຮ້າຍແຮງທີ່ສຸດໄດ້ລະບາດຢູ່ລັດມາຮາຣາສຕຣາ ໂດຍມີ 284 ຄົນເສຍຊີວິດ, ຖັດມາແມ່ນລັດກູຈີຣັດມີ 75 ຄົນເສຍຊີວິດ.
ເຈົ້າໜ້າທີ່ກະຊວງສາທາລະນະສຸກອິນເດຍໃຫ້ຮູ້ວ່າ, ລັດຖະບານໄດ້ສ້າງຕັ້ງໜ່ວຍສຸກເສີນເດີນທາງໄປກວດກາຢູ່ລັດມາຮາຣາສຕຣາແລ້ວ, ຂະນະທີ່ໂຮງໝໍທ້ອງຖິ່ນສົງໄສວ່າ, ໄວຣັດພະຍາດດັ່ງກ່າວອາດໄດ້ປ່ຽນສາຍພັນແລ້ວ.