ເວທີປຶກສາຫາລືການພັດທະນາສັງຄົມແລະຫຼຸດຜ່ອນຄວາມທຸກຍາກຈີນ-ອາຊຽນຄັ້ງທີ 11 ໄດ້ຈັດຂຶ້ນຢູ່ເມືອງຊຽມລຽບປະເທດກຳປູເຈຍໃນຕອນເຊົ້າວັນທີ 25 ກໍລະກົດນີ້ ໂດຍເຈົ້າໜ້າທີ່ລັດຖະບານ, ຜູ້ຊ່ຽວຊານ, ນັກວິຊາການ, ຜູ້ໜ້າສື່ມວນຊົນຂອງຈີນແລະ 10 ປະເທດອາຊຽນພ້ອມດ້ວຍຜູ້ຕາງໜ້າຂອງວິສາຫະກິດຈີນ, ອົງການ NGO ແລະອົງການຈັດຕັ້ງສາກົນ 120 ກວ່າທ່ານເຂົ້າຮ່ວມ.
ທ່ານ ຮົງທ່ຽນຢູນ ຮອງຫົວໜ້າຫ້ອງການຫຼຸດຜ່ອນຄວາມທຸກຍາກລັດຖະບານຈີນ ໄດ້ກ່າວວ່າ, ການຫຼຸດຜ່ອນຄວາມທຸກຍາກ ແມ່ນເປົ້າໝາຍຮ່ວມຂອງການພັດທະນາມະນຸດ, ທັງແມ່ນສິ່ງທ້າທາຍທີ່ຈີນແລະປະເທດໃນອາຊຽນຜະເຊີນຮ່ວມກັນໃນຂະບວນການພັດທະນາປະເທດ. ນັບແຕ່ດຳເນີນການປະຕິຮູບແລະໄຂປະຕູສູ່ໂລກພາຍນອກມາເປັນເວລາ 39 ປີ, ຈີນໄດ້ເຮັດວຽກງານຫຼຸດຜ່ອນຄວາມທຸກຍາກຢ່າງຂະໜາດໃຫຍ່, ມີການຈັດຕັ້ງ ແລະມີແຜນການ ໂດຍສາມາດເຮັດໃຫ້ 700 ລ້ານກວ່າຄົນໄດ້ຫຼຸດຜ່ອນຄວາມທຸກຍາກ. ມາຮອດທ້າຍປີ 2016 ຜ່ານມາ, ຜູ້ທຸກຍາກຢູ່ຊົນນະບົດຈີນ ໄດ້ຫຼຸດລົງເຖິງ 43 ລ້ານ 3 ແສນ 5 ໝື່ນຄົນ ແລະອັດຕາການເກີດຄວາມທຸກຍາກກໍໄດ້ຫຼຸດລົງເຖິງ 4,5%. ຈາກນີ້ ຈີນຈຶ່ງກາຍເປັນປະເທດທີ່ຫຼຸດຜ່ອນຜູ້ທຸກຍາກໄດ້ຫຼາຍທີ່ສຸດໃນໂລກ ແລະກໍແມ່ນປະເທດທີ່ສຳເລັດເປົ້າໝາຍສະຫັດສະວັດຂອງອົງການສະຫະປະຊາຊາດກ່ອນໝູ່ໃນໂລກ.
ຫົວຂໍ້ຂອງເວທີປຶກສາຫາລືຄັ້ງນີ້ເນັ້ນ "ຈີນແລະອາຊຽນ: ການປະດິດສ້າງໃໝ່ແລະພຶດຕິກຳດ້ານການຫຼຸດຜ່ອນຄວາມທຸກຍາກ" ໂດຍຜູ້ຮ່ວມປະຊຸມຈະຫາລືການນຳໃຊ້ຫົວຄິດປະດິດສ້າງແລະຜົນສຳເລັດຂອງຈີນແລະອາຊຽນຕາມທັດສະນະແລະນະໂຍບາຍຫຼຸດຜ່ອນຄວາມທຸກຍາກ, ຊ່ອງທາງການຮ່ວມມືຫຼຸດຜ່ອນຄວາມທຸກຍາກລະຫວ່າງຈີນກັບອາຊຽນ, ການບັນລຸເປົ້າໝາຍພັດທະນາແບບຍືນຍົງປີ 2030 ແລະອື່ນໆ.