ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ແລະ ທ່ານອາລານ ປີເຕີ ຄາເຢຕາໂນ ລັດຖະມົນຕີກະຊວງການຕ່າງປະເທດຟິລິບປິນ ໄດ້ຖະແຫຼງຂ່າວຮ່ວມຢູ່ນະຄອນຫຼວງມະນີລາໃນວັນທີ 25 ກໍລະກົດນີ້ ໂດຍໄດ້ຕອບຄຳຖາມຂອງນັກຂ່າວກ່ຽວກັບບັນຫາທີ່ສອງປະເທດຮ່ວມກັນພັດທະນາຢູ່ທະເລຈີນໃຕ້.
ທ່ານຄາເຢຕາໂນ ກ່າວວ່າ: ເພື່ອບັນລຸການພັດທະນາສາຍພົວພັນລະຫວ່າງຟິລິບປິນແລະຈີນ, ສອງຝ່າຍຄວນປົກປັກຮັກສາສັນຕິພາບແລະສະຖຽນລະພາບ, ສ້າງສະພາບແວດລ້ອມທີ່ດີ ແລະ ຜ່ານການຮ່ວມກັນພັດທະນາຊັບພະຍາກອນທຳມະຊາດເຮັດໃຫ້ປະຊາຊົນສອງຊາດໄດ້ຮັບຜົນປະໂຫຍດຮ່ວມກັນ. ເມື່ອປີ 1986, ຜູ້ນຳສອງປະເທດໄດ້ຕົກລົງກັນແລ້ວວ່າ ສອງປະເທດຕ້ອງພັດທະນາທະເລຈີນໃຕ້ຮ່ວມກັນ. ເຊື່ອວ່າ ຄົນຮຸ່ນພວກເຮົານີ້ຈະມີສະຕິປັນຍາໃນການຊອກຫາຮູບການທີ່ເໝາະສົມເພື່ອພັດທະນາຊັບພະຍາກອນທຳມະຊາດຮ່ວມກັນ ແລະ ສ້າງຄວາມຜາສຸກໃຫ້ແກ່ປະຊາຊົນສອງຊາດ ໂດຍພາຍໃຕ້ການນຳພາຂອງທ່ານປະທານາທິບໍດີໂຣດຣີໂກ ດູເຕີເຕ ແລະ ທ່ານປະທານສີຈິ້ນຜິງ.
ທ່ານຫວາງຢີ້ ກ່າວວ່າ: ຕົນເຫັນດີຕໍ່ທັດສະນະຂອງທ່ານຄາເຢຕາໂນ ໂດຍຢູ່ເຂດທະເລ ທັບຊ້ອນກັນທີ່ບັນດາປະເທດຕ່າງກໍກ່າວອ້າງສິດ ແລະ ຜົນປະໂຫຍດທາງທະເລຂອງປະເທດຕົນນັ້ນ, ຖ້າປະເທດໃດໜຶ່ງພັດທະນາແຕ່ຝ່າຍດຽວ ອີກຝ່າຍອື່ນໆກໍຈະເຄື່ອນໄຫວທີ່ສົມຄູ່ກັນຢ່າງແນ່ນອນ ແລະສົ່ງຜົນເຮັດໃຫ້ສະຖານະການທາງທະເລສັບສົນຂຶ້ນ ຈົນເຮັດໃຫ້ສະພາບການເຄັ່ງຕຶງຂຶ້ນກໍເປັນໄດ້ ແລະໃນທີ່ສຸດກໍບໍ່ມີໃຜສາມາດພັດທະນາໄດ້. ແນວໃດກໍດີ, ວິທີການແກ້ໄຂບັນຫາດັ່ງກ່າວ ກໍຄື ແນວຄວາມຄິດທີ່ເຕັມໄປດ້ວຍສະຕິປັນຍາທາງການເມືອງຂອງທ່ານເຕີ້ງສຽວຜິງ ຜູ້ນຳປະເທດຈີນ ທີ່ໄດ້ສະເໜີຕໍ່ຜູ້ນຳປະເທດຟິລິບປິນກ່ອນໜ້ານີ້ 31 ປີ. ຂະນະທີ່ການຮ່ວມພັດທະນາບໍ່ໄດ້ກະທົບແລະກໍບໍ່ກ່ຽວພັນເຖິງລະບົບກົດໝາຍຂອງແຕ່ລະປະເທດ, ແຕ່ເພື່ອບັນລຸບັນທັດຖານແລະການຈັດວາງທີ່ແຕ່ລະປະເທດສາມາດຮັບຮອງເອົາໄດ້.