ສະພາຄວາມໝັ້ນຄົງອົງການສະຫະປະຊາຊາດ ໄດ້ໄຂກອງປະຊຸມເປີດກວ້າງກ່ຽວກັບບັນຫາປາແລັສຕິນ ໃນວັນທີ 25 ກໍລະກົດນີ້ ໂດຍທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດ, ປະທານໝູນວຽນປະຈຳເດືອນນີ້ ເປັນປະທານ ແລະມີຜູ້ຕາງໜ້າເກືອບ 50 ປະເທດ ແລະ ອົງການຈັດຕັ້ງສາກົນ ລວມທັງ ປະເທດມົນຕີຖາວອນສະພາຄວາມໝັ້ນຄົງ, ປາແລັສຕິນ ແລະ ອິສຣາແອນ ເຂົ້າຮ່ວມ.
ທ່ານຫຼິວເຈຢີ່ ໄດ້ແນະນຳ 4 ຂໍ້ສະເໜີຂອງທ່ານສີຈິ້ນຜິງ ປະທານປະເທດຕົນກ່ຽວກັບການແກ້ໄຂບັນຫາປາແລັສຕິນທີ່ໄດ້ສະເໜີເມື່ອບໍ່ດົນມານີ້ ແລະຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຈົ່ງຕັ້ງໜ້າຕອບຮັບແລະສະໜັບສະໜູນ ເຊິ່ງເນື້ອໃນຂອງ 4 ຂໍ້ສະເໜີມີດັ່ງນີ້:
ໜຶ່ງ ເດັດດ່ຽວຊຸກຍູ້ການແກ້ໄຂບັນຫາໂດຍຊ່ອງທາງການເມືອງບົນພື້ນຖານປະຕິບັດຕາມ "ແຜນການບັນລຸການຢູ່ຮ່ວມກັນໂດຍສັນຕິຢ່າງຖາວອນລະຫວ່າງປາແລັສຕິນ-ອິສຣາແອນ" ຫຼື "ແຜນການສ້າງສອງປະເທດ". ຂະນະທີ່ຈີນເດັດດ່ຽວສະໜັບສະໜູນແຜນການດັ່ງກ່າວ, ສະໜັບສະໜູນການສ້າງຕັ້ງປະເທດປາແລັສຕິນທີ່ຖືເອົາເຢຣູຊາເລມຕາເວັນອອກເປັນນະຄອນຫຼວງ, ມີສິດອຳນາດອະທິປະໄຕຢ່າງຄົບຖ້ວນ ແລະເປັນປະເທດເອກະລາດ ບົນພື້ນຖານຊາຍແດນເມື່ອປີ 1967 ແລະຈະເສີມຂະຫຍາຍບົດບາດທີ່ສ້າງສັນເພື່ອແກ້ໄຂບັນຫາປາແລັສຕິນ.
ສອງ ຍຶດໝັ້ນທັດສະນະຄວາມໝັ້ນຄົງຮ່ວມ, ສັງລວມ, ຮ່ວມມື ແລະ ແບບຍືນຍົງ. ຈີນຮຽກຮ້ອງໃຫ້ບັນດາຝ່າຍຈົ່ງຈັດຕັ້ງປະຕິບັດຕາມມະຕິເລກທີ 2334 ຂອງສະພາຄວາມໝັ້ນຄົງອົງການສະຫະປະຊາຊາດຢ່າງແທ້ຈິງ ຢຸດຕິທຸກການເຄື່ອນໄຫວທີ່ກ່ຽວພັນເຖິງຈຸດຕັ້ງຖິ່ນຖານໃນດິນແດນທີ່ຖືກຍຶດຄອງ, ນຳໃຊ້ມາດຕະການທັນທີ ເພື່ອປ້ອງກັນບໍ່ໃຫ້ເກີດເຫດການຄວາມຮຸນແຮງທີ່ຖືປະຊາຊົນເປັນເປົ້າໝາຍ.
ສາມ ປະສານຄວາມພະຍາຍາມຂອງປະຊາຄົມໂລກຕື່ມອີກ ເພື່ອເສີມສ້າງກຳລັງທີ່ເຂັ້ມແຂງຊຸກຍູ້ສັນຕິພາບ.
ສີ່ ປະຕິບັດນະໂຍບາຍລວມ ຊຸກຍູ້ສັນຕິພາບດ້ວຍການພັດທະນາ. ໃນຂະນະທີ່ຊຸກຍູ້ການເຈລະຈາທາງການເມືອງນັ້ນ, ກໍຄວນໃຫ້ຄວາມສຳຄັນສູງຕໍ່ບັນຫາການພັດທະນາ ແລະຊຸກຍູ້ການຮ່ວມມືລະຫວ່າງປາແລັສຕິນ-ອິສຣາແອນ.
