ເວັບໄຊເບຣທ໌ບາດ ສື່ມວນຊົນຝ່າຍຂວາຈັດອາເມລິກາ ໄດ້ລາຍງານຫວ່າງມໍ່ໆນີ້ວ່າ: ທ່ານເຈມສ໌ ມາຕິສ ລັດຖະມົນຕີກະຊວງປ້ອງກັນປະເທດອາເມລິກາ ໄດ້ຍື່ນແຜນການເຄື່ອນໄຫວຂອງກອງທັບອາເມລິກາປະຈຳປີຕາມເປົ້າ "ເດີນທາງຢ່າງເສລີ" ສະບັບໜຶ່ງໃຫ້ທຳນຽບຂາວໃນເດືອນເມສາປີນີ້. ຈາກນີ້ຈຶ່ງເຮັດໃຫ້ນັກວິເຄາະອອກມາກ່າວວ່າ: ຖ້າວ່າຂ່າວດັ່ງກ່າວເປັນຄວາມຈິງແລ້ວ, ແຜນການດັ່ງກ່າວຈະເຮັດໃຫ້ກອງທັບເຮືອອາເມລິກາມີເສລີພາບໃນການລາດຕະເວນຢູ່ທະເລຈີນໃຕ້ຫຼາຍກວ່າເກົ່າ.
ຂ່າວລາຍງານວ່າ: ລັດຖະບານບາຣັກ ໂອບາມາ ໄດ້ຖື "ການເດີນທາງຢ່າງເສລີ" ຢູ່ທະເລຈີນໃຕ້ທຸກເທື່ອເປັນ "ເຫດການເທື່ອດຽວ" ເທົ່ານັ້ນ, ສະນັ້ນຈຶ່ງຕ້ອງການເວລາດົນສົມຄວນເພື່ອອະນຸມັດ ແລະ ການເຄື່ອນໄຫວຄືແນວນີ້ກໍຖືກເບິ່ງວ່າເປັນການ "ຕອບໂຕ້ຕໍ່ການເຄື່ອນໄຫວທີ່ເປັນຮູບປະທຳຂອງຈີນ" ຫຼາຍກວ່າ. ຂະນະທີ່ແຜນການປະຈຳປີທີ່ວາງອອກໃໝ່ນີ້ ໂດຍກອງທັບອາເມລິກາຮ້ອງຂໍ "ການເດີນທາງຢ່າງເສລີ" ຢູ່ທະເລຈີນໃຕ້ຈະໄດ້ຮັບການອະນຸມັດໄວກວ່າເກົ່າ ອັນຈະເຮັດໃຫ້ກອງທັບອາເມລິກາສາມາດ "ເດີນທາງຢ່າງເສລີ" ຢູ່ທະເລຈີນໃຕ້ ຢ່າງເປັນປົກກະຕິ ແລະ ຕາມກຳນົດ ກໍຈະເຮັດໃຫ້ທຸກການເຄື່ອນໄຫວບໍ່ເປັນ "ເຫດການເທື່ອດຽວ" ອີກ ເພາະນັ້ນຄືສ່ວນໜຶ່ງໃນໂຄງການ "ການເດີນທາງຢ່າງເສລີ" ຂອງກອງທັບອາເມລິກາ.
ມີລາຍງານຂ່າວຕື່ມວ່າ: ປັດຈຸບັນຍັງບໍ່ທັນຮູ້ວ່າ ແຜນການດັ່ງກ່າວແມ່ນສ່ວນໜຶ່ງໃນຍຸດທະສາດອາຊີປາຊີຟິກຂອງລັດຖະບານທຣຳ ຫຼືວ່າ ພຽງແຕ່ຄິດຢາກໃຫ້ "ການເດີນທາງຢ່າງເສລີ" ຢູ່ທະເລຈີນໃຕ້ຂອງກອງທັບອາເມລິກາ ເປັນໄປແບບປົກກະຕິຢ່າງດຽວເທົ່ານັ້ນ. ຂະນະທີ່ແຜນການດັ່ງກ່າວຂອງກອງທັບອາເມລິກາ ໄດ້ເຮັດໃຫ້ນັກສັງເກດການຂອງບາງປະເທດອ້ອມຂ້າງທະເລຈີນໃຕ້ຮູ້ສຶກເປັນຫ່ວງ.
ທ່ານວິກຕໍ ຄໍປຸສ ນາຍພົນບຳນານຂອງຟິລິບປິນ ຊີ້ວ່າ ແຜນການດັ່ງກ່າວເປັນ "ການກະທຳທີ່ບ້າອຳນາດຢ່າງເປີດແປນທັງນັ້ນ". ທ່ານກ່າວວ່າ: ອີກບໍ່ດົນໃນຕໍ່ໜ້າ, ຄວາມສົມດຸນດ້ານກຳລັງຈະພັດທະນາໂດຍຫັນໄປສູ່ທິດທາງທີ່ມີຜົນດີຕໍ່ຈີນ ຈົ່ງລອງຄິດເບິ່ງວ່າ ຮອດເວລານັ້ນ, ຖ້າວ່າຈີນກໍໄປ "ເດີນທາງຢ່າງເສລີ" ຢູ່ເຂດນ້ຳທີ່ໃກ້ລັດກາລີຟໍເນຍ ຫຼື ລັດວໍຊິງຕັນ, ສະຫະລັດອາເມລິກາຈະມີຄວາມຮູ້ສຶກແນວໃດ?
ທ່ານຣາວຢາວປິນ ຮອງຫົວໜ້າສະຖາບັນຄົ້ນຄວ້າຈີນ ມະຫາວິທະຍາໄລມາເລເຊຍ ຊີ້ໃຫ້ເຫັນວ່າ: ການກະທຳຂອງອາເມລິກາຄືເຈຕະນາເພີ່ມທະວີການແຊກແຊງບັນຫາທະເລຈີນໃຕ້ໃນລະດັບໃດໜຶ່ງ ເຊິ່ງຈະເຮັດໃຫ້ສະຖານະການຢູ່ທະເລຈີນໃຕ້ຂະຫຍາຍເປັນວົງກວ້າງໃນສາກົນ ແລະ ສັບສົນຍິ່ງຂຶ້ນ.
