ທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນຢູ່ນະຄອນຫຼວງມານີລາໃນວັນທີ 25 ກໍລະກົດນີ້.
ໂອກາດດັ່ງກ່າວ, ທ່ານ ດູເຕີເຕ ໄດ້ຄວາມຢື້ຢາມຖາມຂ່າວດ້ວຍຄວາມຈິງໃຈເຖິງທ່ານປະທານ ສີຈິ້ນຜິງ ໂດຍຜ່ານທ່ານ ວາງຢີ້ ແລະກ່າວວ່າ, ຟິລິບປິນໃຫ້ຄວາມສຳຄັນສູງຕໍ່ຖານະແລະອິດທິພົນຂອງຈີນໃນສາກົນ, ສຸມໃສ່ສ້າງການພົວພັນສອງຝ່າຍທີ່ແໜ້ນແຟ້ນແລະເຂັ້ມແຂງກວ່າເກົ່າ. ຂະນະດຽວກັນ, ຟິລິບປິນໄດ້ຕີລາຄາສູງຕໍ່ຈີນທີ່ໄດ້ເສີມຂະຫຍາຍບົດບາດທີ່ດີໃນການຊ່ວຍເຫຼືອການສ້າງສາພັດທະນາປະເທດຕົນ ໂດຍສະເພາະຂອບໃຈຈີນທີ່ສະໜັບສະໜູນແລະຊ່ວຍເຫຼືອການຕໍ່ສູ້ຕ້ານລັດທິກໍ່ການຮ້າຍຢູ່ຟິລິບປິນຢ່າງແຂງແຮງ. ແນວໃດກໍດີ, ຟິລິບປິນຮູ້ສຶກພໍໃຈຕໍ່ຄວາມຄືບໜ້າຂອງສາຍພົວພັນສອງປະເທດ ທັງຍິນດີຮ່ວມກັບຈີນ ລົງເລິກການຮ່ວມມືໃນຂົງເຂດຕ່າງໆ, ສືບຕໍ່ສ້າງຄວາມສຸກໃຫ້ປະຊາຊົນສອງປະເທດ ແລະຮ່ວມກັນຊຸກຍູ້ຂະບວນການຮ່ວມມືອາຊີຕາເວັນອອກ.
ທ່ານ ວາງຢີ້ ກໍໄດ້ນຳເອົາຄວາມຢື້ຢາມຖາມຂ່າວຂອງທ່ານປະທານ ສີຈິ້ນຜິງ ເຖິງທ່ານ ດູເຕີເຕ ທັງຊົມເຊີຍຟິລິບປິນທີ່ໄດ້ປະສົບຜົນສຳເລັດໃນການພັດທະນາພາຍໃຕ້ການນຳພາຂອງທ່ານ ດູເຕີເຕ ໃນໜຶ່ງປີຜ່ານມາ ແລະຢ້ຳວ່າ, ຈີນເດັດດ່ຽວສະໜັບສະໜູນຟິລິບປິນປະຕິບັດນະໂຍບາຍການຕ່າງປະເທດທີ່ເປັນເອກະລາດເປັນເຈົ້າຕົນເອງ ແລະເດີນຕາມເສັ້ນທາງການພັດທະນາທີ່ສອດຄ່ອງກັບສະພາບຂອງປະເທດຕົນ.
ທ່ານ ວາງຢີ້ ກ່າວຕື່ມວ່າ, ພາຍໃຕ້ການຕັດສິນໃຈແລະການຊຸກຍູ້ຂອງປະມຸກລັດສອງປະເທດ, ສາຍພົວພັນສອງຝ່າຍໄດ້ບັນລຸຄວາມເປັນມິດຕະພາບຢ່າງຮອບດ້ານ ແລະພວມກ້າວໄປສູ່ອະນາຄົດທີ່ສົດໃສກວ່າເກົ່າ. ຄວາມຈິງແລ້ວບໍ່ວ່າຢູ່ກ່ອນຫຼືຫຼັງສາຍພົວພັນສອງປະເທດໄດ້ຮັບການປັບປຸງດີຂຶ້ນນັ້ນ ລ້ວນແຕ່ພິສູດໃຫ້ເຫັນວ່າ, ຫຼັກການກ່ຽວກັບການເປັນປະເທດໃກ້ຄຽງນັ້ນ, ການປຶກສາຫາລືກັນຍ່ອມດີກວ່າການເປັນປໍລະປັກກັນ, ການຮ່ວມມືກັນ ດີກວ່າຄວາມຂັດແຍ້ງກັນ ແລະທີ່ສຳຄັນ, ປະຫວັດສາດຈະຢັ້ງຢືນວ່າ, ການປັບປຸງສາຍພົວພັນລະຫວ່າງສອງປະເທດນັ້ນ ແມ່ນທາງເລືອກທີ່ຖືກຕ້ອງ.