ວັນທີ 25 ກໍລະກົດນີ້ ທ່ານຫວງເຫວີຍຈິ່ງ ຮອງປະທານອົງການປົກຄອງເຂດປົກຄອງຕົນເອງເຜົ່າຈ້ວງກວາງຊີ ສປ ຈີນກ່າວວ່າ, ເຂດກວາງຊີຈະເປີດກວ້າງຂະໜາດການຮ່ວມມືດ້ານການສຶກສາກັບຕ່າງປະເທດ ໂດຍເລັ່ງລັດຊຸກຍູ້ການສ້າງມະຫາວິທະຍາໄລປະສົມຈີນ-ອາຊຽນ ເພື່ອຍົກຄຸນນະພາບການຮ່ວມມືກັນໃຫ້ສູງຂຶ້ນຕື່ມ ແລະສູ້ຊົນຮອດປີ 2020, ສະຖາບັນການສຶກສາຊັ້ນສູງແຕ່ລະແຫ່ງຕ້ອງມີໂຄງການ ລະດັບປະລິຍາຕີທີ່ຮ່ວມມືກັບຕ່າງປະເທດຢ່າງໜ້ອຍ 1 ໂຄງການ.
ທ່ານຫວງເຫວີຍຈິ່ງສະເໜີແຜນດັ່ງກ່າວໃນກອງປະຊຸມເປີດປະຕູສູ່ພາຍນອກທາງດ້ານການສຶກສາຂອງເຂດກວາງຊີ ທີ່ຈັດຂຶ້ນຢູ່ ເມືອງໜານນິງ ເທດສະບານເຂດກວາງຊີໃນວັນທີ 25 ກໍລະກົດນີ້ ຂະນະດຽວກັນ, ທ່ານກໍໄດ້ກ່າວຕື່ມວ່າ ຫຼາຍປີມໍ່ໆມານີ້ ການສົ່ງນັກສຶກສາໄປສຶກສາຢູ່ຕ່າງປະເທດ ແລະຮັບນັກສຶກສາຕ່າງປະເທດໄດ້ຮັບການສົ່ງເສີມຕໍ່ເນື່ອງ ໂດຍເຫັນໄດ້ຈາກຈຳນວນນັກສຶກສາຕ່າງປະເທດທີ່ ຮຽນຢູ່ເຂດກວາງຊີນັ້ນມີຫຼາຍກວ່າ 5 ໝື່ນ 2 ພັນຄົນ, ໃນນັ້ນ ນັກສຶກສາຈາກບັນດາປະເທດໃນອາຊຽນ 3 ໝື່ນ 9 ພັນກວ່າຄົນ ສົ່ງຜົນເຮັດໃຫ້ກາຍເປັນແຂວງໜຶ່ງ ທີ່ຮັບເອົານັກສຶກສາບັນດາປະເທດອາຊຽນຫຼາຍທີ່ສຸດໃນຈີນ.
 |
