ວັນທີ 26 ກໍລະກົດນີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ລົມໂທລະສັບກັບທ່ານເຣດໂນ ມາຊູດີ ລັດຖະມົນຕີກະຊວງການຕ່າງປະເທດອິນໂດເນເຊຍ ໂດຍສອງຝ່າຍໄດ້ແລກປ່ຽນຄວາມເຫັນກ່ຽວກັບສາຍພົວພັນລະຫວ່າງສອງປະເທດ ແລະ ສະຖານະການປາແລັສຕິນ-ອິສຣາແອນ.
ທ່ານຫວາງຢີ້ ກ່າວວ່າ: ປະມຸກລັດສອງປະເທດໄດ້ບັນລຸຂໍ້ຕົກລົງທີ່ສຳຄັນກ່ຽວກັບການເຊື່ອມຍຸດທະສາດພັດທະນາຂອງສອງປະເທດ ແລະ ລົງເລິກການຮ່ວມມືໃນຂອບ "ໜຶ່ງແລວທາງໜຶ່ງເສັ້ນທາງ" ແລະຫວັງເຮັດໃຫ້ສາຍພົວພັນລະຫວ່າງສອງປະເທດພັດທະນາກ້າວຂຶ້ນສູ່ລະດັບໃໝ່. ຂະນະທີ່ທ່ານມາຊູດີ ກໍໄດ້ສະແດງຄວາມເຫັນພ້ອມຕໍ່ຄຳເຫັນຂອງທ່ານຫວາງຢີ້ ແລະ ກ່າວວ່າ: ປະເທດຕົນຫວັງຈະລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດກັບຈີນ ແລະ ຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນ.
ກ່ຽວກັບສະຖານະການປາແລັສຕິນ-ອິສຣາແອນ, ທ່ານມາຊູດີ ກ່າວວ່າ: ສະຖານະການປາແລັສຕິນ-ອິສຣາແອນໃນປັດຈຸບັນເຮັດໃຫ້ທົ່ວໂລກເປັນຫ່ວງ, ຂະນະທີ່ປະຊາຄົມໂລກກໍຫວັງວ່າຈີນໃນຖານະເປັນປະເທດປະທານໝູນວຽນຂອງສະພາຄວາມໝັ້ນຄົງອົງການສະຫະປະຊາຊາດປະຈຳເດືອນນີ້ ຈະເສີມຂະຫຍາຍບົດບາດໃຫ້ຫຼາຍກວ່າເກົ່າເພື່ອເຮັດໃຫ້ສະຖານະການໃນປັດຈຸບັນຫຼຸດຜ່ອນລົງໂດຍໄວ.
ທ່ານຫວາງຢີ້ ຊີ້ວ່າ: ເມື່ອບໍ່ດົນມານີ້, ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານອັບບັສ ປະທານາທິບໍດີປາແລັສຕິນ ແລະໄດ້ສະເໜີ 4 ຂໍ້ກ່ຽວກັບບັນຫາປາແລັສຕິນ ໂດຍໄດ້ເນັ້ນວ່າຄວນຍຶດໝັ້ນທັດສະນະຄວາມໝັ້ນຄົງຮ່ວມ, ສັງລວມ, ຮ່ວມມື ແລະ ແບບຍືນຍົງ. ແນວໃດກໍດີ, ປາແລັສຕິນ ແລະ ອິສຣາແອນ ຄວນພະຍາຍາມເດີນຕາມເສັ້ນທາງແຫ່ງຄວາມໝັ້ນຄົງທີ່ກໍ່ສ້າງແລະຊົມໃຊ້ຮ່ວມກັນ. ຂະນະທີ່ຈີນໃນຖານະເປັນເພື່ອນມິດຂອງຕາເວັນອອກກາງແລະປະເທດມຸສລິມ ກໍຍິນສືບຕໍ່ເສີມຂະຫຍາຍບົດບາດອັນຕັ້ງໜ້າເພື່ອແກ້ໄຂການປະທະກັນໃນປັດຈຸບັນຢ່າງເໝາະສົມ.
