ວັນທີ 26 ກໍລະກົດນີ້, 47 ສະມາຊິກອົງການການຄ້າໂລກ ເປັນຕົ້ນ ຣັດເຊຍ, ການາດາ, ອົສຕຣາລີ ແລະ ແມັກຊິກ ໄດ້ຮ່ວມກັນຮຽກຮ້ອງເຖິງທຸກໆສະມາຊິກຂອງອົງການດັ່ງກ່າວຈົ່ງພະຍາຍາມຮ່ວມກັນ ເພື່ອຮັບປະກັນໃຫ້ໂຄງປະກອບການຄ້າຫຼາຍຝ່າຍ ເຊິ່ງມີອົງການການຄ້າໂລກເປັນຕົວແທນນັ້ນສາມາດເຄື່ອນໄຫວຢ່າງມີປະສິດທິພາບ.
ໃນຖະແຫຼງການຮ່ວມທີ່ປະກາດໃນວັນດັ່ງກ່າວ, 47 ສະມາຊິກອົງການການຄ້າໂລກ ລວມທັງກຸ່ມເສດຖະກິດທີ່ພັດທະນາແລ້ວ ແລະ ກຸ່ມເສດຖະກິດພວມພັດທະນາ ໄດ້ສະແດງຄວາມເປັນຫ່ວງຕໍ່ສິ່ງທ້າທາຍຕ່າງໆ ທີ່ອົງການດັ່ງກ່າວພວມປະເຊີນໃນປັດຈຸບັນ ໂດຍລະບຸວ່າ: ໃນຫຼາຍເດືອນຜ່ານມາ, ໂດຍປິ່ນອ້ອມກອງປະຊຸມລະດັບລັດຖະມົນຕີຂອງອົງການການຄ້າໂລກທີ່ຈະຈັດຂຶ້ນໃນເດືອນທັນວາປີນີ້ ເຖິງວ່າບັນດາສະມາຊິກ ໄດ້ຍື່ນບົດປະກອບຄຳເຫັນແລະຂໍ້ສະເໜີກ່ຽວກັບຫົວຂໍ້ເຈລະຈາໄລຍະຍາວທີ່ອາດຈະມີຂຶ້ນເປັນຕົ້ນກໍຕາມ, ແຕ່ຈົນມາຮອດປັດຈຸບັນ ພັດຍັງຂາດເຈດຕະນາລົມໃນການສະແຫວງຫາຄວາມຜ່ອນຜັນເພື່ອບັນລຸການເປັນເອກະພາບກັນ.
ບັນດາສະມາຊິກທີ່ລົງນາມໃນຖະແຫຼງການດັ່ງກ່າວ ລ້ວນແຕ່ສະໜັບສະໜູນໂຄງປະກອບການຄ້າຫຼາຍຝ່າຍຢ່າງແຂງແຮງ ທັງຮຽກຮ້ອງທຸກໆສະມາຊິກຈົ່ງຮັບປະກັນຄວາມສົມບູນຄົບຖ້ວນ ແລະ ການເຄື່ອນໄຫວຢ່າງມີປະສິດທິພາບຂອງໂຄງປະກອບການຄ້າຫຼາຍຝ່າຍ ເຊິ່ງມີອົງການການຄ້າໂລກເປັນຕົວແທນ.
ນອກນີ້, ບັນດາສະມາຊິກດັ່ງກ່າວຍັງເນັ້ນວ່າ: ໃນຕໍ່ໜ້າ, ອົງການການຄ້າໂລກຈະສືບຕໍ່ເສີມຂະຫຍາຍບົດບາດທີ່ສຳຄັນເພື່ອບັນລຸການພັດທະນາແບບຍືນຍົງທີ່ມີການກວມລວມຫຼາຍກວ່າ ລວມທັງໃຫ້ປະເທດດ້ອຍພັດທະນາເຂົ້າຮ່ວມການຄ້າສາກົນຫຼາຍຍິ່ງຂຶ້ນ.
