ຕາມຂ່າວCRI: ວັນທີ 26 ກໍລະກົດນີ້ ຢູ່ນະຄອນຫຼວງວຽງຈັນ ສປປ ລາວ, ສະຖານທູດຈີນປະຈຳລາວໄດ້ຈັດງານລ້ຽງຮັບຮອງສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 90 ປີ ໂດຍພົນໂທ ຈັນສະໝອນ ຈັນຍະລາດ ກຳມະການກົມການເມືອງສູນກາງພັກປະຊາຊົນປະຕິວັດລາວ, ລັດຖະມົນຕີກະຊວງປ້ອງກັນປະເທດລາວ, ທ່ານ ວາງເວີນທ່ຽນ ເອກອັກຄະລັດຖະທູດຈີນປະຈຳລາວ ເຈົ້າໜ້າທີ່ສະຖານທູດ, ເຈົ້າໜ້າທີ່ພັກ-ລັດກອງທັບລາວ, ຊາວຈີນຕ່າງດ້າວແລະຊາວລາວເຊື້ອສາຍຈີນ,ຜູ້ຕາງໜ້າບໍລິສັດຈີນແລະຄະນະທູດທະຫານຈີນປະຈຳລາວເກືອບ 300 ກວ່າທ່ານເຂົ້າຮ່ວມ.
ທ່ານ ເຊີນຢົງຈິ້ງ ທູດທະຫານສະຖານທູດຈີນປະຈຳລາວກ່າວວ່າ: ໃນຊຸມປີຜ່ານມາ, ການແລກປ່ຽນແລະການຮ່ວມມືໃນຂົງເຂດຕ່າງໆລະຫວ່າງສອງກອງທັບຈີນແລະລາວໄດ້ຮັບການພັດທະນາແລະກ້າວສູ່ລວງເລິກຢ່າງບໍ່ຢຸດຢັ້ງ ແລະໄດ້ຮັບໝາກຜົນຢ່າງຫຼວງຫຼາຍ,ໂດຍໄດ້ປະກອບສ່ວນສຳຄັນຕໍ່ການເສີມຂະຫຍາຍສາຍພົວພັນລະຫວ່າງສອງປະເທດແລະການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ. ໃນໄລຍະກອງທັບປົດປ່ອຍປະຊາຊົນຈີນຍິນດີຮ່ວມກັບກອງທັບປະຊາຊົນລາວເສີມຂະຫຍາຍບົດບາດພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ກ້າວເຂົ້າສູ່ລວງເລິກ,ຊຸກຍູ້ການແລກປ່ຽນວຽກງານປ້ອງກັນຊາດແລະການຮ່ວມມືດ້ານການທະຫານລະຫວ່າງຈີນ-ອາຊຽນ,ຊຸກຍູ້ການສ້າງປະຊາຄົມຮ່ວມຊະຕາກຳທີ່ຕ່າງຝ່າຍຕ່າງມີຜົນປະໂຫຍດ ແລະ ຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງພາກພື້ນກໍຄືຂອງໂລກ.
ງານລ້ຽງດັ່ງກ່າວເຕັມໄປດ້ວຍບັນຍາກາດແຫ່ງນ້ຳໃຈໄມຕີຈິດມິດຕະພາບແລະຄຶກຄື້ນມ່ວນຊື່ນ ໂດຍຄະນະສິລະປະກອນກອງທັບປະຊາຊົນລາວໄດ້ສະແດງຫຼາຍລາຍການສ້າງໄດ້ຄວາມເບີກບານມ່ວນຊື່ນໃຫ້ແກ່ຜູ້ເຂົ້າຮ່ວມໄດ້ເປັນຢ່າງດີ.
