ຕອນເຊົ້າວັນທີ 27 ກໍລະກົດນີ້ ທີ່ໂຮງໝໍ 103 ນະຄອນຫຼວງວຽງຈັນ ໄດ້ເປີດບໍລິການການແພດ ຕາມຄຳຂວັນ "ຂະບວນລົດໄຟສັນຕິພາບ" 2017 ລາວ-ຈີນ ຂຶ້ນ ໂດຍທ່ານ ພົນຈັດຕະວາ ບຸນສູງ ຢາທໍ່ຕູ້ ຮອງຫົວໜ້າກົມໃຫຍ່ພະລາທິການ ກອງທັບປະຊາຊົນລາວ, ທ່ານ ພັນເອກ ໄພວັນ ຈັນທະພົມມາ ຮອງຫົວໜ້າກົມພົວພັນຕ່າງປະເທດ ພ້ອມດ້ວຍຜູ້ແທນຝ່າຍລາວ ແລະ ຈີນເຂົ້າຮ່ວມຢ່າງຫຼວງຫຼາຍ.
ທ່ານ ພັນເອກ ບົວສິງ ອິນທະວົງ ຫົວໜ້າກົມເສນາຮັກ ກະຊວງປ້ອງກັນປະເທດ ໄດ້ສະແດງຄວາມ ຂອບໃຈຄະນະເສນາຮັກຈີນທີ່ມາເຮັດວຽກຢູ່ລາວ ເຊິ່ງເປັນການສະແດງໃຫ້ເຫັນເຖິງນ້ຳໃຈຊ່ວຍເຫຼືອຢ່າງເອື້ອເຟື້ອເຜື່ອແຜ່ ແລະມິດຕະພາບທີ່ຈິງໃຈຂອງຈີນຕໍ່ລາວ. ຈາກນີ້, ພວກຂ້າພະເຈົ້າຈະເຮັດສຸດຄວາມສາມາດ ແລະ ຈະອຳນວຍຄວາມສະດວກທຸກປະການໃຫ້ຄະນະແພດໝໍຈີນໄດ້ເຮັດໜ້າທີ່ອັນມີກຽດຂອງຕົນໃຫ້ສຳເລັດໄປດ້ວຍດີ. ໂຄງການບໍລິການທາງການແພດຄັ້ງນີ້ ເປັນສັນຍະລັກແຫ່ງການຮ່ວມມືສອງກອງທັບລາວ-ຈີນ. ໂດຍສະເພາະແມ່ນການຮ່ວມມືໃນວຽກງານເສນາຮັກຂອງສອງຝ່າຍ ທັງເປັນການຮ່ວມມື ເພື່ອຮັບປະກັນສຸຂະພາບໃຫ້ການນຳຂັ້ນສູງ ພະນັກງານນັກຮົບທົ່ວກອງທັບປະຊາຊົນລາວ.
ທ່ານ ພັນເອກພິເສດ ເສີ້ນ ຢົງຈີ້ງ ທູດທະຫານ ສປ ຈີນ ປະຈຳ ສປປລາວ ກ່າວວ່າ: ເພື່ອປະກອບສ່ວນທີ່ສຳຄັນໃຫ້ແກ່ການ "ກໍ່ສ້າງປະຊາຄົມຮ່ວມຊະຕາກຳຂອງມວນມະນຸດ" ແລະເພື່ອ ປົກປັກຮັກສາ ແລະ ຊຸກຍູ້ໃຫ້ຂົງເຂດນີ້ມີສັນຕິພາບ, ມິດຕະພາບ ແລະ ການຮ່ວມມືກັນ ສຳລັບໂຄງການການບໍລິການປິ່ນປົວສຸຂະພາບ ຄັ້ງນີ້ຈະດຳເນີນແຕ່ວັນທີ 27/07-05/08/2017 ໂດຍຄະນະແພດຈີນພວກເຮົາໄດ້ເອົາໃຈໃສ່ກະກຽມດ້ວຍຄວາມມານະອົດທົນ ແລະ ລະອຽດຖີ່ຖ້ວນ ເພື່ອຮັບປະກັນການກວດສຸຂະພາບ, ປິ່ນປົວ ແລະ ຜ່າຕັດໃຫ້ແກ່ນາຍ ແລະ ພົນທະຫານກອງທັບປະຊາຊົນລາວ ພ້ອມຄອບຄົວ ແລະ ປະຊາຊົນລາວຈຳນວນໜຶ່ງ.