ທ່ານກາວເຟິງ ໂຄສົກກະຊວງການຄ້າຈີນເປີດເຜີຍໃນພິທີຖະແຫຼງຂ່າວໃນວັນທີ 27 ກໍລະກົດນີ້ວ່າ: ໃນ 5 ປີຕໍ່ໜ້າ, ຈີນຈະນຳເຂົ້າສິນຄ້າທີ່ມີມູນຄ່າກວ່າ 8.000 ຕື້ໂດລາສະຫະລັດ ແລະ ລົງທຶນໂດຍກົງຢູ່ຕ່າງປະເທດກວ່າ 750 ຕື້ໂດລາສະຫະລັດ ໃນນີ້ ມູນຄ່າ 2.000 ຕື້ໂດລາສະຫະລັດຈະນຳເຂົ້າສິນຄ້າຈາກປະເທດຢູ່ລຽບຕາມໜຶ່ງແລວທາງໜຶ່ງເສັ້ນທາງ ແລະ ລົງທຶນຢູ່ປະເທດຢູ່ລຽບຕາມໜຶ່ງແລວທາງໜຶ່ງເສັ້ນທາງ 150 ຕື້ໂດລາສະຫະລັດ ເຊິ່ງຈະເປັນໂອກາດທີ່ໃຫຍ່ຫຼວງສຳລັບການພັດທະນາຂອງປະເທດຕ່າງໆ.
ຂ່າວແຈ້ງວ່າ: ໄລຍະຜ່ານມາ, ອາເມລິກາ, ເຢຍລະມັນ ແລະ ອັງກິດເປັນຕົ້ນລ້ວນແຕ່ມີຂໍ້ຈຳກັດຫຼາຍຂຶ້ນ ແລະຢູ່ບາງປະເທດໄດ້ຮຽກຮ້ອງໃຫ້ເພີ່ມທະວີການກວດກາຄວາມປອດໄພຕໍ່ການລົງທຶນຈາກຕ່າງປະເທດ ຈົນກະທັ້ງອອກຂໍ້ກົດໝາຍທີ່ກ່ຽວຂ້ອງ. ຕໍ່ເລື່ອງນີ້, ທ່ານກາວເຟິງ ຊີ້ໃຫ້ເຫັນວ່າ: ພວກຂ້າພະເຈົ້າເຫັນວ່າ ການກວດກາຄວາມປອດໄພຕໍ່ການລົງທຶນໃນຂົງເຂດທີ່ອ່ອນໄຫວນັ້ນ ແມ່ນສິດຊອບດ້ວຍກົດໝາຍຂອງແຕ່ລະປະເທດ, ແຕ່ກໍບໍ່ຄວນໃຊ້ເປັນມາດຕະການສົ່ງເສີມລັດທິປົກປ້ອງການຄ້າ.
ນອກນີ້, ທ່ານກາວເຟິງ ຍັງຊີ້ໃຫ້ເຫັນວ່າ: ຈີນຖ້ອມເລັ່ງຊຸກຍູ້ເສດຖະກິດໂລກາພິວັດ ແລະ ການຄ້າ-ການລົງທຶນທີ່ເສລີຢ່າງສະເໝີຕົ້ນສະເໝີປາຍ ທັງຄັດຄ້ານລັດທິປົກປ້ອງການຄ້າ ແລະ ເປີດກວ້າງການເປີດປະຕູຕໍ່ພາຍນອກຢ່າງບໍ່ຢຸດຢັ້ງ.