ສຳນັກຂ່າວສານເປຕຣາລາຍງານໃນວັນທີ 27 ກໍລະກົດນີ້ວ່າ: ໃນມື້ດັ່ງກ່າວ, ທ່ານ ອັບດູລາ ອັນ ຮຸສເຊັນ ເຈົ້າຊີວິດປະເທດຊັອກດານີໄດ້ຮຽກຮ້ອງໃຫ້ທ່ານ ເບັນຈາມິນ ເນຕັນຢາຮູ ນາຍົກລັດຖະມົນຕີອິສຣາແອນ,ລົງໂທດເຈົ້າໜ້າທີ່ສະຖານທູດອິສຣາແອນປະຈຳປະເທດຕົນຫຼັງຍິງປະຊາຊົນປະເທດຕົນເສຍຊີວິດສອງຄົນຕາມກົດໝາຍ.
ຕອນຄ່ຳວັນທີ 23 ກໍລະກົດນີ້, ຢູ່ໃກ້ສະຖານທູດອິສຣາແອນປະຈຳຊັອກດານີທີ່ນະຄອນຫຼວງອຳມານໄດ້ເກີດເຫດຍິງຄົນເສຍຊີວິດ. ໂດຍສື່ມວນຊົນໄດ້ລາຍງານວ່າ: ເກີດການຖຽງກັນລະຫວ່າງຊາວຊັອກດານີຜູ້ໜຶ່ງກັບເຈົ້າໜ້າທີ່ສະຖານທູດອິສຣາແອນປະຈຳປະເທດຕົນຍ້ອນບັນຫາການສົ່ງເຟີນີເຈີບໍ່ຖືກຕາມເວລາກຳນົດ. ຈາກນັ້ນຊາວຊັອກດານີທີ່ເປັນຄູ່ກໍລະນີໄດ້ໃຊ້ໄຂຄວງແທງຊາວອິສຣາແອນ ແລະຊາວອິສຣາແອນກໍຍິງຊາວຊັອກດານີຜູ້ນີ້ເສຍຊີວິດ. ຂະນະທີ່ເຈົ້າຂອງເຮືອນຊາວຊັອກດານີກໍຖືກຍິງເສຍຊີວິດຫຼັງບໍ່ສາມາດປິ່ນປົວໄດ້.
ຫວ່າງມໍ່ໆມານີ້, ຊັອກດານີໄດ້ເຂົ້າໄປມີຄວາມຂັດແຍ້ງລະຫວ່າງປາແລັສຕິນ-ອິສຣາແອນຮອບໃໝ່ ໂດຍເຫັນໄດ້ຈາກໃນວັນທີ 21 ກໍລະກົດນີ້, ຢູ່ຫຼາຍຕົວເມືອງຂອງຊັອກດານີໄດ້ເກີດການແຫ່ຂະບວນຕໍ່ຕ້ານອິສຣາແອນຂະໜາດໃຫຍ່,ປະຊາຊົນຫຼາຍໝື່ນຄົນອອກສູ່ຖະໜົນເພື່ອປະທ້ວງອິສຣາແອນທີ່ປະຕິບັດຕໍ່ "ເຂດເກືອດຫ້າມທີ່ສູງສົ່ງ"ຫຼືວັດພູຫວ່າງມໍ່ໆນີ້ ໂດຍຮຽກຮ້ອງໃຫ້ອິສຣາແອນຢຸດຕິການກະທຳແບບນີ້ທັນທີ. ເຫດການຍິງຄົນເສຍຊີວິດຄັ້ງນີ້ໄດ້ເພີ່ມອາລົມຂອງປະຊາຊົນຊັອກດານີໃນການຕໍ່ຕ້ານອິສຣາແອນຕື່ມອີກ.