ກອງປະຊຸມວິຊາການແນວພືດສາກົນຄັ້ງທີ 19 ທີ່ຈັດຂຶ້ນຢູ່ນະຄອນເຊີ່ນເຈີ້ນແຂວງກວາງຕຸ້ງ ສປ ຈີນເປີດເຜີຍວ່າ: ພູພຽງຊິງໄຫ-ຕິເບດໄດ້ສຳເລັດການສ້າງເຂດອະນຸລັກທຳມະຊາດຕ່າງໆ 155 ແຫ່ງຢູ່ພູພຽງດັ່ງກ່າວໃນເນື້ອທີ່ເຖິງ 822.400 ກິໂລຕາແມັດ ໂດຍກວມ 32,35% ຂອງເນື້ອທີ່ພູພຽງດັ່ງກ່າວ.
ນັບແຕ່ຊຸມປີ 1980 ເປັນຕົ້ນມາ, ເຖິງວ່າໄດ້ຮັບຜົນກະທົບທີ່ນັບມື້ຮຸນແຮງຈາກນ້ຳມືຂອງມະນຸດກໍຕາມ,ແຕ່ສິ່ງແວດລ້ອມແລະຊີວະນາໆພັນຢູ່ເຂດພູພຽງຊິງໄຫ-ຕິເບດໄດ້ຮັບການອະນຸລັກແລະປັບປຸງດີຂຶ້ນເປັນຢ່າງດີ ໂດຍສາມາດຮັບປະກັນການນຳໃຊ້ຊັບພະຍາກອນທຳມະຊາດໄດ້ຢ່າງຍືນຍົງແລະການໝູນວຽນຂອງລະບົບນິເວດທຳມະຊາດໄດ້ເປັນຢ່າງດີ. ມາຮອດປັດຈຸບັນ, ພູພຽງຊິງໄຫ-ຕິເບດໄດ້ກາຍເປັນສະຫວັນຂອງສັດປ່າທີ່ຫາຍາກຈຳນວນຫຼາຍ,ແລະກາຍເປັນສິ່ງຮັບປະກັນຄວາມປອດໄພທີ່ສຳຄັນຂອງລະບົບນິເວດ.