ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ຢ້ຳເຖິງຫຼັກໝັ້ນຂອງຈີນໃນບັນຫານິວເຄຼຍແຫຼມເກົາຫຼີ ໂດຍກ່າວວ່າ ມີແຕ່ເຈລະຈາໂດຍສັນຕິຈິ່ງຈະສາມາດແກ້ໄຂບັນຫານິວເຄຼຍແຫຼມເກົາຫຼີໄດ້.
ຂະນະທີ່ຕອບຄຳຖາມຂອງນັກຂ່າວກ່ຽວກັບບັນຫານີ້, ທ່ານອະທິບາຍວ່າ: ຕົ້ນຕໍແລ້ວ, ແຫຼ່ງກຳເນີດຂອງບັນຫານິວເຄຼຍແຫຼມເກົາຫຼີບໍ່ແມ່ນຢູ່ຈີນ, ຂະນະທີ່ຈຸດສຳຄັນໃນການແກ້ໄຂບັນຫານີ້ໃນປັດຈຸບັນກໍບໍ່ຂຶ້ນກັບຈີນເຊັ່ນກັນ. ແນວໃດກໍດີ ເປັນແນ່ນອນວ່າ, ໃນຖານະເປັນປະເທດໃກ້ຄຽງທີ່ສຳຄັນຂອງແຫຼມເກົາຫຼີ, ຈີນໄດ້ຕັ້ງໜ້າຮ່ວມກັບປະຊາຄົມໂລກ ເພື່ອແກ້ໄຂບັນຫານິວເຄຼຍແຫຼມເກົາຫຼີໂດຍຜ່ານວິທີການເຈລະຈາທາງການເມືອງ. ຫຼັກໝັ້ນຂອງຈີນແມ່ນແຈ່ມແຈ້ງທີ່ສຸດ ກໍຄືຍຶດໝັ້ນການຊຸກຍູ້ໃຫ້ແຫຼມເກົາຫຼີປອດນິວເຄຼຍ. ຈີນຈະຍຶດໝັ້ນຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ ແລະແກ້ໄຂບັນຫານີ້ໂດຍຜ່ານການເຈລະຈາໂດຍສັນຕິເທົ່ານັ້ນ.
ຂະນະດຽວກັນ, ທ່ານກໍກ່າວວ່າ, ຈີນສົ່ງເສີມໃຫ້ສ.ເກົາຫຼີແລະສປປ ເກົາຫຼີເຈລະຈາກັນ ເຊິ່ງຈະເປັນຜົນດີຊ່ວຍໃຫ້ສະຖານະການທີ່ເຄັ່ງຕຶງຢູ່ແຫຼມເກົາຫຼີຫຼຸດຜ່ອນລົງ ແລະສ້າງບັນຍາກາດທີ່ດີໃຫ້ແກ່ບັນດາຝ່າຍແກ້ໄຂບັນຫານີ້ຢ່າງເໝາະສົມໂດຍຜ່ານວິທີການເຈລະຈາກັນ.