ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນ ກ່າວໃນການຖະແຫຼງຂ່າວທີ່ຈັດຂຶ້ນໃນວັນທີ 27 ກໍລະກົດນີ້ວ່າ, ຈາກຄວາມພະຍາຍາມຮ່ວມຂອງຈີນແລະປະເທດໃນອາຊຽນ, ສາຍພົວພັນສອງຝ່າຍພວມຈາກໄລຍະເຕີບໃຫຍ່ທີ່ພັດທະນາຢ່າງວ່ອງໄວນັ້ນ ກ້າວໄປສູ່ໄລຍະທີ່ຄຸນນະພາບດີຂຶ້ນ, ຍົກລະດັບ ແລະສົດໃສ.
ທ່ານ ລູ້ຄ່າງ ກ່າວວ່າ, ຈີນໃຫ້ຄວາມສຳຄັນສູງຕໍ່ສາຍພົວພັນກັບອາຊຽນຕະຫຼອດມາ ແລະຖືອາຊຽນເປັນບຸລິມະສິດໃນວຽກງານການຕ່າງປະເທດກັບປະເທດອ້ອມຂ້າງຈີນຢ່າງສະເໝີຕົ້ນສະເໝີປາຍ. ປີ 2017 ແມ່ນປີຄົບຮອບ 50 ປີແຫ່ງການສ້າງຕັ້ງອາຊຽນ ແລະປີຄົບຮອບ 15 ປີທີ່ຈີນ-ອາຊຽນສ້າງສາຍພົວພັນຄູ່ຮ່ວມຍຸດທະສາດ ເຊິ່ງຈາກຄວາມພະຍາຍາມຮ່ວມຂອງຈີນແລະປະເທດໃນອາຊຽນ, ສາຍພົວພັນສອງຝ່າຍ ໄດ້ຮັກສາທ່ວງທ່າຂະຫຍາຍຕົວຢ່າງປອດໃສແລະໝັ້ນທ່ຽງ ແລະພວມຈາກໄລຍະເຕີບໃຫຍ່ທີ່ພັດທະນາຢ່າງວ່ອງໄວນັ້ນ ກ້າວໄປສູ່ໄລຍະສົດໃສທີ່ຄຸນນະພາບດີຂຶ້ນແລະຍົກລະດັບ. ສາມາດເວົ້າໄດ້ວ່າ, ການຮ່ວມມືລະຫວ່າງສອງຝ່າຍ ມີຄວາມເປັນເອກະພາບກັນຢ່າງໝັ້ງຄົງ ທັງມີຜົນງານຢ່າງຫຼວງຫຼາຍ ແລະມີອະນາຄົດທີ່ສົດໃສ.
ທ່ານ ລູ້ຄ່າງ ກ່າວຕື່ມວ່າ, ໃນໂອກາດທ່ານ ວາງຢີ້ ລັດຖະມົນຕີກະຊວງການຕ່າປະເທດຈີນ ພົບປະກັບທູຕານຸທູດຂອງ 10 ປະເທດອາຊຽນປະຈຳຈີນນັ້ນ, ທ່ານກໍໄດ້ສະເໜີຄວາມຄິດສາມຂໍ້ກ່ຽວກັບການເສີມຂະຫຍາຍສາຍພົວພັນສອງຝ່າຍ ຄື: ໜຶ່ງ, ສາຍພົວພັນຈີນ-ອາຊຽນຕ້ອງເລັງໃສ່ອະນາຄົດ ແລະກ້າວໄປສູ່ໄລຍະໃໝ່; ສອງ, ການຮ່ວມມືອາຊີຕາເວັນອອກ ຕ້ອງກຳໂອກາດ ແລະສ້າງອະນາຄົດໃໝ່ ແລະສາມ, ຕ້ອງຂ້າມສິ່ງຂັດຂວາງໃນບັນຫາທະເລຈີນໃຕ້ແລະຮັກສາທ່ວງທ່າທີ່ດີ.
 |
