ຫວ່າງມໍ່ໆນີ້, ທ່ານ ຊີປູ້ ເອກອັກຄະລັດຖະທູດຈີນປະຈຳອາຊຽນ ໄດ້ຈັດງານລ້ຽງຕ້ອນຮັບຜູ້ນຳຊາວໜຸ່ມ 10 ປະເທດອາຊຽນໃນໂອກາດເຂົ້າຮ່ວມກິດຈະກຳ "ວັນຊາວໜຸ່ມອາຊຽນ" ຢູ່ນະຄອນຫຼວງຈາກາຕາ ໂດຍມີຜູ້ນຳຊາວໜຸ່ມ 10 ປະເທດອາຊຽນ, ເຈົ້າໜ້າທີ່ກອງເລຂາອາຊຽນ ພ້ອມດ້ວຍນັກການທູດຊາວໜຸ່ມຂອງຈີນປະຈຳອາຊຽນ 50 ກວ່າທ່ານເຂົ້າຮ່ວມ.
ທ່ານ ຊີປູ້ ໄດ້ກ່າວປາໄສໂດຍເນັ້ນວ່າ, ປະຊາກອນ 67% ຂອງອາຊຽນ ແມ່ນຊາວໜຸ່ມທີ່ມີອາຍຸຕ່ຳກວ່າ 35 ປີ ແລະຢູ່ຈີນກໍມີຊາວໜຸ່ມຫຼາຍກວ່າ 400 ລ້ານຄົນ, ຈາກນີ້, ການເພີ່ມທະວີການແລກປ່ຽນລະຫວ່າງຊາວໜຸ່ມແນວໃດນັ້ນ ແມ່ນເລື່ອງ ສຳຄັນຂອງສອງຝ່າຍ. ຂ້າພະເຈົ້າຫວັງວ່າ ເພື່ອນຊາວໜຸ່ມທຸກທ່ານຈະສາມາດສຳຜັດຕົວຈິງຢູ່ຈີນໃຫ້ຫຼາຍກວ່ານີ້ ແລະປະກອບສ່ວນເພື່ອການພັດທະນາເສດຖະກິດ, ຄວາມປອງດອງທາງສັງຄົມ ແລະການປະສານຈິດໃຈຂອງຈີນແລະປະເທດອາຊຽນໃຫ້ຫຼາຍກວ່າເກົ່າ.
ທ່ານ ວົງເທບ ອາທາໄກວັນວະຕີ ຮອງເລຂາທິການໃຫຍ່ທີ່ຊີ້ນຳວຽກງານປະຊາຄົມສັງຄົມວັດທະນະທຳອາຊຽນ ກ່າວວ່າ, ຈີນເປັນຄູ່ເຈລະຈາທີ່ສຳຄັນທີ່ສຸດຂອງອາຊຽນ ແລະໄດ້ສະໜັບສະໜູນການສ້າງປະຊາຄົມອາຊຽນເປັນເວລາດົນນານມາແລ້ວ, ສອງຝ່າຍໄດ້ຮັບໝາກສຜົນຈາກການຮ່ວມມືໃນຂົງເຂດຊາວໜຸ່ມ, ການສຶກສາ ແລະການທ່ອງທ່ຽວຢ່າງຫຼວງຫຼາຍ. ຜູ້ນຳຊາວໜຸ່ມທີ່ມາຮ່ວມປະຊຸມ ລ້ວນແຕ່ເປັນຜູ້ຕາງໜ້າທີ່ດີເລີດຂອງຊາວໜຸ່ມອາຊຽນ ເຊິ່ງຫວັງວ່າພວກທ່ານຈະສາມາດເພີ່ມທະວີການແລກປ່ຽນ, ສ້າງມິດຕະພາບ, ແບກຫາບພັນທະປະຫວັດສາດເພື່ອບັນລຸຄວາມກ້າວໜ້າຂອງອາຊຽນ ແລະປະກອບສ່ວນຢ່າງຕັ້ງໜ້າເພື່ອຊຸກຍູ້ສາຍພົວພັນອາຊຽນ-ຈີນໃຫ້ຂະຫຍາຍຕົວກ້າວໜ້າຢ່າງບໍ່ຢຸດຢັ້ງ.
 |
