ພິທີສວນສະໜາມສະຫຼອງວັນຄົບຮອບ90ປີຂອງການສ້າງຕັ້ງກອງທັບປົດປ່ອຍປະຊາຊົນຈີນໄດ້ຈັດຂຶ້ນຢູ່ຖານຝຶກຊ້ອມຈູ່ຢື້ເຮີ ເຂດປົກຄອງຕົນເອງມົງໂກໃນ ສປ ຈີນໃນເວລາ 9 ໂມງຂອງວັນທີ 30 ກໍລະກົດນີ້ໂດຍທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ,ປະທານຄະນະກຳມະການການທະຫານສູນກາງຈີນໄດ້ກວດແຖວສາມເຫຼົ່າທັບທັງກ່າວປາໄສໃນພິທີດັ່ງກ່າວ.
ນີ້ເປັນເທື່ອທຳອິດທີ່ຈີນຈັດພິທີສວນສະໜາມຢ່າງຍິ່ງໃຫຍ່ໂດຍເນັ້ນການສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນ ຫຼັງ ສປ ຈີນສະຖາປະນາຂຶ້ນໂດຍກຳລັງທະຫານໄດ້ເດີນສະໜາມຢ່າງສະຫງ່າຜ່າເຜີຍໃນທ່າກຽມພ້ອມສູ້ຮົບເພື່ອຮັບການກວດກາຈາກພັກແລະປະຊາຊົນ.
ພິທີສວນສະໜາມເທື່ອນີ້ມີນາຍແລະພົນທະຫານ 10000 ກວ່າຄົນເຂົ້າຮ່ວມ, ຍົນ 129 ລຳແລະອາວຸດຍຸດໂທປະກອນ 571 ຊຸດເຂົ້າຮ່ວມ ໃນນີ້ ອາວຸດຍຸດໂທປະກອນ 40% ແມ່ນເປີດຕົວໃຫ້ທົ່ວໂລກໄດ້ເຫັນເປັນເທື່ອທຳອິດ.
ການເດີນສວນສະໜາມໄດ້ເລີ່ມຂຶ້ນໂດຍມີກ້ອນກຳລັງປ້ອງກັນທຸງ, ກຸ່ມຍົນສູ້ຮົບທີ່ບິນໃນຮູບແຖວປະກອບເປັນເຄື່ອງໝາຍລະນຶກວັນຄົບຮອບ 90 ປີຂອງການສ້າງຕັ້ງກອງທັບ ພ້ອມດ້ວຍກຸ່ມກ້ອນກຳລັງສູ້ຮົບ 9 ກຸ່ມຄືກອງກຳລັງສູ້ຮົບເທິງບົກ, ສູ້ຮົບດ້ານເຕັກໂນໂລຊີຂໍ້ມູນຂ່າວສານ, ກອງຕີພິເສດ,ກອງປ້ອງກັນອາກາດຕ້ານລູກສອນໄຟ,ສູ້ຮົບທາງທະເລ, ທາງອາກາດ, ພະລາທິການສັງລວມ, ຕ້ານການກໍ່ການຮ້າຍເພື່ອຮັກສາຄວາມສະຫງົບແລະກອງກຳລັງໂຈມຕີທາງຍຸດທະສາດ.
ຫຼັງຮັບການກວດແຖວແລ້ວ, ນາຍແລະພົນທະຫານສາມເຫຼົ່າທັບໄດ້ໂຮມສູນຢູ່ໜ້າແທ່ນກຽດຕິຍົດຢ່າງວ່ອງໄວເພື່ອຮັບຟັງການປາໄສຂອງທ່ານປະທານສີຈິ້ນຜິງ. ເວລາຈົບປາໄສໄດ້ມີສຽງຕົບມືດັງຂຶ້ນຢ່າງຟົດຟື້ນ, ຈາກນີ້, ພິທີສວນສະໜາມທີ່ຍິ່ງໃຫຍ່ແລະສະຫງ່າຜ່າເຜີຍກໍໄດ້ສິ້ນສຸດລົງດ້ວຍຜົນສຳເລັດຢ່າງຈົບງາມ.