ໃນຖານະເປັນໜຶ່ງໃນບັນດາກອງປະຊຸມການຮ່ວມມືລະດັບລັດຖະມົນຕີຂອງປະເທດບຣິກໃນປີ 2017, ກອງປະຊຸມລະດັບລັດຖະມົນຕີ ອຸດສາຫະກຳຂອງປະເທດບຣິກຄັ້ງທີ 2 ໄດ້ໄຂຂຶ້ນຢູ່ເມືອງຫາງໂຈວປະເທດຈີນໃນວັນທີ 29 ກໍລະກົດນີ້ ໂດຍໄດ້ຜ່ານຮັບຮອງ ແຜນການດຳເນີນງານກ່ຽວກັບການລົງເລິກການຮ່ວມມືໃນຂົງເຂດອຸດສາຫະກຳລະຫວ່າງບັນດາປະເທດບຣິກ.
ຜູ້ຮ່ວມປະຊຸມໄດ້ບັນລຸການເປັນເອກະພາບກັນຢ່າງກວ້າງຂວາງໃນ 6 ດ້ານຄື: ການຮ່ວມມືດ້ານຄວາມສາມາດການຜະລິດ, ການປະສານງານແລະເຊື່ອມຕໍ່ນະໂຍບາຍອຸດສາຫະກຳແລະຍຸດທະສາດພັດທະນາ, ການຮ່ວມມືດ້ານພື້ນຖານໂຄງລ່າງແລະການປະຕິດສ້າງເຕັກນິກ, ການຮ່ວມມືລະຫວ່າງວິສາຫະກິດຂະໜາດກາງແລະນ້ອຍ, ການຮ່ວມມືໃນຂົງເຂດມາດຕະຖານ ແລະການຮ່ວມມືກັບອົງການພັດທະນາອຸດສາຫະກຳຂອງອົງການສະຫະປະຊາຊາດ.
ບັນດາລັດຖະມົນຕີທີ່ຮ່ວມປະຊຸມເປັນເອກະສັນກັນເຫັນວ່າ, ເສດຖະກິດໂລກໃນປັດຈຸບັນຍັງຢູ່ໃນໄລຍະສັບຊ້ອນຢ່າງເລິກເຊິ່ງຫຼັງເກີດວິກິດການການເງິນສາກົນ, ການພັດທະນາເສດຖະກິດຂາດພະລັງຊຸກດັນພາຍໃນ, ອຸດສາຫະກຳໂດຍສະເພາະແມ່ນການຜະລິດ ແລະການບໍລິການທີ່ກ່ຽວພັນກັບການຜະລິດນັ້ນແມ່ນປັດໄຈທີ່ສຳຄັນໃນການບັນລຸການພັດທະນາເສດຖະກິດຢ່າງຕໍ່ເນື່ອງໃນໄລຍະກາງແລະຍາວນານ.
ທ່ານມຽວເວີຍຊີ ລັດຖະມົນຕີກະຊວງອຸດສາຫະກຳ ແລະເຕັກໂນໂລຊີຂໍ້ມູນຂ່າວສານຈີນຊີ້ວ່າ, ຈີນຍິນດີຮ່ວມກັບບັນດາປະເທດບຣິກແບ່ງປັນບົດຮຽນແລະວິທີການທີ່ສຳເລັດຜົນຂອງຕົນໃນການພັດທະນາອຸດສາຫະກຳ, ເພີ່ມທະວີການແລກປ່ຽນດ້ານນະໂຍບາຍ, ລົງເລິກການຮ່ວມມມືດ້ານອຸດສາຫະກຳ, ເພື່ອບັນລຸການພັດທະນາຮ່ວມກັນ.
 |
