ວັນທີ 30 ກໍລະກົດນີ້, ຂະນະທີ່ເຈົ້າໜ້າທີ່ຕຳຫຼວດຟີລິບປິນໄດ້ປະຕິບັດໜ້າທີ່ປາບປາມຢາເສບຕິດຢູ່ເກາະມິນດານາວທາງພາກໃຕ້ປະເທດຕົນນັ້ນກໍໄດ້ເກີດການຍິງປະທະກັນ ສົ່ງຜົນເຮັດໃຫ້ມີຜູ້ເສຍຊີວິດ 12 ຄົນໃນນີ້ມີເຈົ້າເມືອງໂອຈາມິສຢູ່ນຳດ້ວຍ.
ເຈົ້າໜ້າທີ່ຕຳຫຼວດໃຫ້ຮູ້ວ່າ: ເວລາປະມານ 2 ໂມງ 30 ນາທີຂອງວັນທີ 30 ກໍລະກົດນີ້ຕາມເວລາທ້ອງຖິ່ນ, ເຈົ້າໜ້າທີ່ຕຳຫຼວດຈຳນວນໜຶ່ງໄດ້ຮັບການມອບໝາຍໃຫ້ໄປປະຕິບັດໜ້າທີ່ກວດຄົ້ນຢ່າງກະທັນຫັນຢູ່ເມືອງໂອຈາມິສ ແຂວງມີຊາມີສໂອຊິເດັນຕອນ, ແຕ່ດ້ວຍປະສົບການສູ້ທາງກຳລັງອາວຸດຂະນະທີ່ກວດຄົ້ນຢູ່ເຮືອນຂອງເຈົ້າເມືອງດັ່ງກ່າວ, ເຈົ້າໜ້າທີ່ຕຳຫຼວດຈິ່ງຍິງປືນຕອບໂຕ້ຄືນ. ຈາກການຍິງປະທະກັນຄັ້ງນີ້ໄດ້ເຮັດໃຫ້ມີ 12 ຄົນເສຍຊີວິດລວມເຖິງເຈົ້າເມືອງໂອຈາມິສພ້ອມພັນລະຍາ. ນອກຈາກຍຶດຢາເສບຕິດໄດ້ຈຳນວນໜຶ່ງແລ້ວ, ເຈົ້າໜ້າທີ່ຕຳຫຼວດຍັງຍຶດອາວຸດໄດ້ເປັນຈຳນວນຫຼາຍເປັນຕົ້ນ ໝາກແຕກ,ອຸປະກອນຍິງຈະຫຼວດແລະອື່ນໆຢູ່ຈຸດກວດຄົ້ນແຫ່ງຕ່າງໆ.
ສື່ມວນຊົນຟີລິບປິນລາຍງານວ່າ: ກ່ອນໜ້ານີ້, ທ່ານໂຣດຣີໂກ ດູເຕີເຕ ປະທານາທິບໍດີຟີລິປິນເຄີຍ ບົ່ງຊື່ແລະນາມສະກຸນເຈົ້າເມືອງຜູ້ນີ້ເປັນຜູ້ຖືກສົງໄສຄ້າຂາຍຢາເສບຕິດ ແລະເຈົ້າໜ້າທີ່ຕຳຫຼວດກໍໄດ້ຈັດກຳລັງຕິດຕາມສອດແນມການເຄື່ອນໄຫວຂອງເຈົ້າເມືອງຜູ້ນີ້ມາໂດຍຕະຫຼອດ.
 |
