ພິທີສ້າງຕັ້ງມູນນິທິແມ່ຍິງຊາມາຣາງປະເທດອິນໂດເນເຊຍໄດ້ຈັດຂຶ້ນໃນວັນທີ 29 ກໍລະກົດນີ້ໂດຍທ່ານເຜິງຢີ້ມູ້ ຮອງຫົວໜ້າກົງສຸນໃຫຍ່ຈີນປະຈຳເມືອງຊູຣາບາຢາອິນໂດເນເຊຍ, ທ່ານເຮເວຍຣິຕາ ຮອງເຈົ້າຄອງເມືອງຊາມາຣາງອິນໂດເນເຊຍແລະທ່ານຫຼິນເວິນກວ່າງ ປະທານສະມາຄົມສຳພັນມິດຕະພາບຄະນະຈັດຕັ້ງສັງຄົມຟູຊິງໂລກ ໄດ້ກ່າວປາໄສໃນພິທີດັ່ງກ່າວ.
ທ່ານເຜິງຢີ້ມູ້ກ່າວວ່າ ເມືອງຊາມາຣາງມີສາຍພົວພັນຢ່າງແໜ້ນແຟ້ນກັບທ່ານເຈີ້ງເຮີ ທູດມິດຕະພາບສະໄໝລາຊະວົງມິງຂອງຈີນໂດຍເຫັນໄດ້ຈາກກ່ອນໜ້ານີ້ 600 ກວ່າປີ,ຂະນະທີ່ທ່ານເຈີ້ງເຮີໄດ້ຂີ່ເຮືອຢ້ຽມຢາມມະຫາສະໝຸດອິນເດຍແລະປາຊີຟິກນັ້ນກໍໄດ້ຂຶ້ນເກາະຊາວາຈາກເມືອງຊາມາຣາງກ່ອນໂດຍໄດ້ນຳເອົາຜ້າໄໝ,ເຄື່ອງປັ້ນດິນເຜົາແລະຊາພ້ອມດ້ວຍຊັບສົມບັດແລະຄວາມຮູ້ມາສູ່ເມືອງຊາມາຣາງ ເຊິ່ງໄດ້ເພີ່ມທະວີມິດຕະພາບລະຫວ່າງປະຊາຊົນຈີນກັບປະຊາຊົນອິນໂດເນເຊຍ ທັງໄດ້ຮັບຄວາມເຄົາລົບນັບຖືແລະຄວາມຮັກແພງຈາກປະຊາຊົນເມືອງຊາມາຣາງ. ຫຼາຍປີຜ່ານມາ, ຄະນະຈັດຕັ້ງຄົນເຊື້ອສາຍຈີນຂອງເມືອງຊາມາຣາງນອກຈາກໄດ້ສາມັກຄີປອງດອງກັບພີ່ນ້ອງຮ່ວມຊາດແລະສືບທອດວັດທະນະທຳຈີນແລ້ວຍັງໄດ້ສຸມໃສ່ຈັດກິດຈະກຳເພື່ອສາທາລະນະປະໂຫຍດ, ຊ່ວຍເຫຼືອຜູ້ທຸກຍາກ,ສາມັກຄີກັບຄົນເຊື້ອສາຍເພື່ອນມິດ,ສົ່ງເສີມຄວາມເຊື່ອມໂຍງເຂົ້າກັນລະຫວ່າງຊົນຊາດຕ່າງໆ. ຈາກນີ້ຈິ່ງຫວັງວ່າ ມູນນິທິແມ່ຍິງເມືອງຊາມາຣາງທີ່ສ້າງຕັ້ງຂຶ້ນໃໝ່ນີ້ຈະສືບທອດຈິດໃຈຂອງທ່ານເຈີ້ງເຮີໃນການຊ່ວຍເຫຼືອ ແລະເຄົາລົບນັບຖືເຊິ່ງກັນແລະກັນເພື່ອປະກອບສ່ວນໃນການຮ່ວມມືໃນສັງຄົມແລະຄວາມສາມັກຄີປອງດອງລະຫວ່າງເຊື້ອສາຍຕ່າງໆຂອງເມືອງຊາມາຣາງຕື່ມອີກ.
 |
