ກະຊວງການຕ່າງປະເທດຊີຣີ ໄດ້ສົ່ງຈົດໝາຍເຖິງເລຂາທິການໃຫຍ່ແລະປະທານສະພາຄວາມໝັ້ນຄົງອົງການສະຫະປະຊາຊາດໃນວັນທີ 30 ກໍລະກົດນີ້ ໂດຍຕຳໜິວ່າ, ການໂຈມຕີຊີຣີທາງອາກາດຂອງກຸ່ມພັນທະມິດສາກົນທີ່ນຳໂດຍອາເມລິກາ ສົ່ງຜົນເຮັດໃຫ້ປະຊາຊົນທີ່ບໍ່ມີໂທດຫຍັງເສຍຊີວິດແລະບາດເຈັບ ແລະຮຽກຮ້ອງໃຫ້ຍຸບສະຫະພັນດັ່ງກ່າວ.
ຈົດໝາຍຂອງກະຊວງການຕ່າງປະເທດຊີຣີ ລະບຸວ່າ, ນັບແຕ່ສ້າງຕັ້ງຂຶ້ນມານີ້, ກຸ່ມພັນທະມິດສາກົນໄດ້ໂຈມຕີຊີຣີທາງອາກາດເລື້ອຍໆ ເຊິ່ງພຽງເດືອນດຽວຄືເດືອນກໍລະກົດນີ້ ກໍໄດ້ໂຈມຕີຢູ່ພາກຕາເວັນອອກ ແລະພາກຕາເວັນອອກສຽງເໜືອຂອງປະເທດຕົນເຖິງ 7 ເທື່ອ ສົ່ງຜົນເຮັດໃຫ້ປະຊາຊົນໂດຍສະເພາະແມ່ຍິງແລະເດັກນິກທີ່ບໍ່ມີໂທດຫຍັງເສຍຊີວິດແລະບາດເຈັບຢ່າງຫຼວງຫຼາຍ.
ທັງນີ້, ອາເມລິກາແລະປະເທດອື່ນໆໄດ້ສ້າງຕັ້ງກຸ່ມພັນທະມິດສາກົນເມື່ອເດືອນກັນຍາປີ 2014 ເພື່ອໂຈມຕີ ເປົ້າໝາຍຂອງກຸ່ມຫົວຮຸນແຮງ IS ຢູ່ຊີຣີແລະອີຣັກທາງອາກາດ. ແຕ່ລັດຖະບານຊີຣີເຫັນວ່າ, ການກະທຳດັ່ງກ່າວ ບໍ່ໄດ້ຮັບການມອບສິດຈາກສະພາຄວາມໝັ້ນຄົງສະຫະປະຊາຊາດ ແລະຕຳໜິວ່າ ການໂຈມຕີທາງອາກາດສົ່ງຜົນເຮັດໃຫ້ປະຊາຊົນເສຍຊີວິດແລະບາດເຈັບຢ່າງຫຼວງຫຼາຍ.