ໜັງສືພິມວຽງຈັນທາມສະບັບວັນທີ 1 ສິງຫານີ້ລາຍງານວ່າ: ມາຮອດທ້າຍເດືອນກໍລະກົດຜ່ານມາ, ມີຄົນລາວ 23 ຄົນເສຍຊີວິດຈາກລະເບີດບໍ່ທັນແຕກທີ່ຕົກຄ້າງໃນປາງສົງຄາມຕໍ່ຕ້ານອາເມລິກາ, ຂະນະທີ່ປີຜ່ານມາມີ 59 ຄົນເສຍຊີວິດແລະບາດເຈັບ.
ພິທີຖະແຫຼງຂ່າວເພື່ອລະນຶກວັນຄົບຮອບ 7 ປີແຫ່ງການບັງຄັບໃຊ້ສັນຍາສາກົນວ່າດ້ວຍການຫ້າມໃຊ້ລະເບີດລູກຫວ່ານໃນວັນທີ 31 ກໍລະກົດນີ້ໄດ້ຍົກໃຫ້ເຫັນວ່າ:ປີ 2008, ລາວເປັນປະເທດທີສອງທີ່ລົງນາມໃນສັນຍາດັ່ງກ່າວຖັດຈາກນັອກແວ ແລະສັນຍາດັ່ງກ່າວ ມີຜົນສັກສິດຢ່າງເປັນທາງການໃນວັນທີ 1 ສິງຫາ 2010 ແລະການທີ່ລາວຈັດກິດຈະກຳລະນຶກວັນເຫດການດັ່ງກ່າວກໍເພື່ອເປັນການຫວນຄືນປະຫວັດສາດທີ່ແສນທຸກທໍລະມານກ່ຽວກັບລະເບີດບໍ່ທັນແຕກຢູ່ປະເທດຕົນ.
ອົງການສະຫະປະຊາຊາດເພື່ອການພັດທະນາຫຼືUNDPໄດ້ຮ່ວມກັບລັດຖະບານລາວ ຕັ້ງເປົ້າໝາຍໄລຍະຍາວເພື່ອລົບລ້າງຜົນສະທ້ອນຂອງລະເບີດບໍ່ທັນແຕກໂດຍໃນບົດລາຍງານຂອງUNDPລະບຸວ່າ, ຈາກການສະໜັບສະໜູນຂອງປະຊາຄົມໂລກ, ອົງການເກັບກູ້ລະເບີດບໍ່ທັນແຕກຂອງລາວສາມາດເກັບກູ້ລະເບີດບໍ່ທັນແຕກຕ່າງໆໄດ້ 1 ລ້ານ 8 ແສນກວ່າໜ່ວຍພາຍໃນເວລາ 20 ປີຜ່ານມາ.
ໃນສະໄໝສົງຄາມຕໍ່ຕ້ານອາເມລິກາ, ອາເມລິກາໄດ້ຖິ້ມລະເບີດໃສ່ປະເທດລາວເຖິງ 2 ລ້ານກວ່າໂຕນ ໃນນີ້ມີລະເບີດລູກຫວ່ານເປັນຈຳນວນຫຼາຍ ແລະກໍໃນຈຳນວນນີ້ມີປະມານ 30% ບໍ່ທັນແຕກເທື່ອ.