ຄະນະກຳມະການປະສານງານການລົງທຶນອິນໂດເນເຊຍເປີດເຜີຍສະຖິຕິຫຼ້າສຸດສະແດງໃຫ້ເຫັນວ່າ, ໃນ 6 ເດືອນຕົ້ນປີນີ້, ອັດຕາລົງທຶນຕົວຈິງຂອງຈີນຢູ່ປະເທດຕົນໄດ້ເພີ່ມຂຶ້ນຢ່າງຈະແຈ້ງ, ໂດຍບັນລຸຍອດມູນຄ່າການລົງທຶນເຖິງ 1 ຕື້ 960 ລ້ານໂດລາສະຫະລັດ. ຂະນະທີ່ທ່ານ ທອມ ເລັມບົງ, ປະທານຄະນະກຳມະການດັ່ງກ່າວກໍໄດ້ກ່າວວ່າ, ບໍ່ວ່າຈະເປັນຂະໜາດຫຼືຄຸນນະພາບ, ການລົງທຶນຈາກປະເທດຈີນລ້ວນແຕ່ໄດ້ເພີ່ມຂຶ້ນຢ່າງຈະແຈ້ງ.
ເນື່ອງຈາກການເຫັນສະພາບການລົງທຶນທີ່ສົດໃສໃນອະນາຄົດ, ແລະສະຖາບັນຈັດອັນດັບຄວາມເຊື່ອມໝັ້ນການລົງທຶນສາກົນເຊັ່ນບໍລິສັດສະແຕນດາດ ແອນ ພົວສ໌ ແລະອື່ນໆໄດ້ຍົກລະດັບສິນເຊື່ອຂອງໜີ້ສິນພາກລັດຂອງອິນໂດເນເຊຍຂຶ້ນເປັນລະດັບການລົງທຶນນັ້ນ, ລັດຖະບານປະເທດດັ່ງກ່າວຈຶ່ງໄດ້ຕັ້ງເປົ້າອັດຕາການເຕີບໂຕດ້ານການລົງທຶນໃນປີ 2018 ເປັນ 17,2%, ໂດຍຄາດວ່າຈະດຶງດູດການລົງທຶນໂດຍກົງຈາກຕ່າງປະເທດໄດ້ເຖິງ 60 ຕື້ໂດລາສະຫະລັດ.