ທາງດ່ວນແຕ່ກົ້ງເຮີສູ່ຢູ້ຊູ້ແຂວງຊິ່ງໄຫ ສປ ຈີນ ເຊິ່ງເປັນທາງດ່ວນຢູ່ເຂດດິນນ້ຳກ້ອນຫຼາຍປີທີ່ໜາວແຮງແລະສູງຈາກລະດັບໜ້ານ້ຳທະເລສາຍທຳອິດຂອງໂລກ ໄດ້ເປີດບໍລິການຢ່າງເປັນທາງການໃນວັນທີ 1 ສິງຫານີ້ ຫຼັງກໍ່ສ້າງມາເປັນເວລາເກືອບ 7 ປີ.
ທາງດ່ວນສາຍນີ້ ເປັນທາງດ່ວນສາຍທຳອິດທີ່ສ້າງຢູ່ເຂດດິນນ້ຳກ້ອນຫຼາຍປີຂອງພູພຽງຊິ່ງໄຫຕິເບດ ທັງຍັງສູງຈາກລະດັບໜ້ານ້ຳທະເລ ແລະຜ່ານເຂດໜາວແຮງ ໂດຍທັງສາຍຜ່ານເຂດດິນນ້ຳກ້ອນ, ໃນນັ້ນ ໄລຍະທາງທີ່ຜ່ານເຂດດິນນ້ຳກ້ອນຫຼາຍປີນັ້ນ ມີຄວາມຍາວເຖິງ 227 ກິໂລແມັດ ກວມ 36% ຂອງໄລຍະທາງທັງໝົດ. ການສ້າງພື້ນທາງ, ອຸໂມງ ແລະຂົວຢູ່ເຂດດິນນ້ຳກ້ອນຫຼາຍປີນັ້ນ ຈະເຮັດໃຫ້ດິນນ້ຳກ້ອນລະລາຍ ເຊິ່ງເປັນບັນຫາທີ່ຫຼີກບໍ່ໄດ້ ແລະເປັນການສ້າງເສັ້ນທາງແບບນີ້ທີ່ບໍ່ເຄີຍມີມາກ່ອນຢູ່ຈີນລວມທັງໃນໂລກ, ແຕ່ສະຖາບັນສຳຫຼວດແລະອອກແບບທາງຫຼວງທີໜຶ່ງຂອງບໍລິສັດຫຸ້ນສ່ວນກໍ່ສ້າງຄົມມະນາຄົມຈີນຈຳກັດ ທີ່ຮັບຜິດຊອບການອອກແບບລວມໂຄງການດັ່ງກ່າວ ໄດ້ອີງໃສ່ຜົນການຄົ້ນຄວ້າດິນນ້ຳກ້ອນມາເປັນເວລາ 40 ປີ ດຳເນີນການແກ້ໄຂບັນຫາຫຍຸ້ງຍາກດ້ານເຕັກນິກຈຳນວນໜຶ່ງ ແລະເປັນໄປຕາມຫຼັກວິທະຍາສາດໃນການປ້ອງກັນບໍ່ໃຫ້ດິນນ້ຳກ້ອນລະລາຍ. ຈາກນັ້ນຈຶ່ງໄດ້ດຳເນີນການກໍ່ສ້າງຢ່າງວ່ອງໄວແລະເປັນຮູບປະທຳ.
 |
