ວັນທີ 3 ສິງຫານີ້, ທ່ານ ເກີງສວງ ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມຂອງນັກຂ່າວ ກ່ຽວກັບທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນຈະເຂົ້າຮ່ວມກອງປະຊຸມລັດຖະມົນຕີການຕ່າງປະເທດຕ່າງໆດ້ານການຮ່ວມມືອາຊີຕາເວັນອອກ ແລະການສະຫຼອງວັນສ້າງຕັ້ງອາຊຽນຄົບຮອບ 50 ປີວ່າ, ການພົວພັນຈີນ-ອາຊຽນ ພວມຢູ່ໃນໄລຍະສຳຄັນທີ່ສືບທອດຈາກອັນເກົ່າມາສູ່ອັນໃໝ່ ແລະຍົກລະດັບໃຫ້ສູງຂຶ້ນ ເຊິ່ງເປັນໂອກາດໃໝ່ທີ່ຈະພັດທະນາໃຫຍ່ກວ່າເກົ່າ.
ທ່ານ ເກີງສວງ ກ່າວວ່າ, ຈີນໃຫ້ຄວາມສຳຄັນສູງຕໍ່ມິດຕະພາບແລະການຮ່ວມມືກັບອາຊຽນ ແລະຖືອາຊຽນເປັນທິດທາງບຸລິມະສິດການຕ່າງປະເທດອ້ອມຂ້າງ ແລະເຂດສຳຄັນໃນການຊຸກຍູ້ການຮ່ວມມື "ໜຶ່ງແລວທາງໜຶ່ງເສັ້ນທາງ". ປີນີ້ເປັນປີສ້າງຕັ້ງອາຊຽນຄົບຮອບ 50 ປີ ແລະເປັນປີຮ່ວມມືທ່ອງທ່ຽວຈີນ-ອາຊຽນ, ຈຂະນະທີ່ປີໜ້າແມ່ນປີຈີນ-ອາຊຽນສ້າງການພົວພັນຄູ່ຮ່ວມຍຸດທະສາດຄົບຮອບ 15 ປີ, ສະນັ້ນ, ການພົວພັນສອງຝ່າຍພວມຢູ່ໃນໄລຍະສຳຄັນທີ່ສືບທອດຈາກອັນເກົ່າມາສູ່ອັນໃໝ່ ແລະຍົກລະດັບໃຫ້ສູງຂຶ້ນ ແລະພົບໂອກາດໃໝ່ທີ່ຈະພັດທະນາໃຫຍ່ກວ່າເກົ່າ. ແນວໃດກໍດີ, ຈີນຍິນດີລົງເລິກການຮ່ວມມືທີ່ແທດເໝາະຕົວຈິງກັບອາຊຽນ, ສ້າງການພົວພັນຄູ່ຮ່ວມຍຸດທະສາດຈີນ-ອາຊຽນທີ່ມີລະດັບສູງກວ່າເກົ່າ ແລະສ້າງປະຊາຄົມຮ່ວມຊະຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
 |
