ຄະນະກຳມະການຄວາມປອດໄພຄົມມະນາຄົມການາດາເປີດເຜີຍໃນວັນທີ 6 ສິງຫານີ້ວ່າ: ຢູ່ສະໜາມບິນສາກົນເປຍຊັນເມືອງໂຕຣອນໂຕປະເທດຂອງຕົນໄດ້ເກີດອຸບັດເຫດເຮືອບິນໂບອິງສອງລຳຕຳກັນໃນຄືນວັນທີ 5 ສິງຫານີ້ຫຼັງປີກເຮືອບິນສອງລຳນີ້ປະທະກັນສົ່ງຜົນເຮັດໃຫ້ເກີດຄວາມເສຍຫາຍຢ່າງໜັກໜ່ວງ, ແຕ່ບໍ່ໄດ້ສົ່ງຜົນເຮັດໃຫ້ມີຜູ້ເສຍຊີວິດແລະບາດເຈັບ.
ຂ່າວແຈ້ງວ່າ: ອຸບັດເຫດເກີດຂຶ້ນໃນເວລາ 22 ໂມງ 18 ນາທີຂອງວັນທີ 5 ສິງຫານີ້ ໂດຍເຮືອບິນໂດຍສານໂບອິງ 767-300 ຂອງບໍລິສັດການບິນການາດາເດີນທາງກັບຈາກປະເທດໂດມີນີກັນ ຂະນະທີ່ລົງຈອດຢູ່ອາຄານໂດຍສານ 1 ຂອງສະໜາມບິນສາກົນເປຍຊັນໂຕຣອນໂຕກໍໄດ້ຕຳເຮືອບິນໂດຍສານໂບອິງ 787 ລຳໜຶ່ງຂອງບໍລິສັດການບິນໂປໂລຍທີ່ກຳລັງລໍຖ້າຜູ້ໂດຍສານ. ຫຼັງເກີດເຫດ, ເຈົ້າໜ້າທີ່ສະໜາມບິນໄດ້ອົບພະຍົບຜູ້ໂດຍສານໃນເຮືອບິນສອງລຳອອກດ້ວຍຄວາມປອດໄພທັງສືບສວນສອບສວນຫາສາເຫດຂອງອຸບັດເຫດດັ່ງກ່າວ.
ໂທລະພາບການາດາລາຍງານໃນຄືນວັນທີ 6 ສິງຫານີ້ວ່າ: ອຸບັດເຫດຄັ້ງນີ້ອາດຈະເກີດຂຶ້ນເນື່ອງຈາກພະນັກງານພາກພື້ນດິນສະໜາມບິນຢຸດງານແລະພະນັກງານທີ່ສະໜາມບິນ ຈ້າງຊົ່ວຄາວນັ້ນບໍ່ຖະໜັດການປະຕິບັດໜ້າທີ່ວຽກງານ.
 |
