ເມື່ອບໍ່ດົນມານີ້, ທ່ານນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍ ໄດ້ຢືນຢັນຢູ່ນະຄອນຫຼວງກົວລາລຳເປີວ່າ: ນັບແຕ່ປີ 2009-2016, ຍອດລາຍຮັບແຫ່ງຊາດຂອງປະເທດຕົນໄດ້ເພີ່ມຂຶ້ນເກືອບ 50% ແລະສາມາດສ້າງຕຳແໜ່ງວຽກເຮັດງານທຳໄດ້ 2.260.000 ຕຳແໜ່ງ.
ທ່ານນາຈິບ ຊີ້ໃຫ້ເຫັນວ່າ: ລັດຖະບານໄດ້ນຳໃຊ້ຫຼາຍມາດຕະການທັງການປະຕິຮູບ ເພື່ອຮັບປະກັນໃຫ້ວິສາຫະກິດ ແລະ ນັກທຸລະກິດໄດ້ຮັບການພັດທະນາເຕີບໂຕ ເຊິ່ງເຮັດໃຫ້ປະເທດຕົນກາຍເປັນປະເທດໃຫ້ຄວາມສຳຄັນຕໍ່ການຄ້າ. ຂະນະທີ່ອົງການກອງທຶນເງິນຕາສາກົນ ຫຼື IMF ກໍເຫັນວ່າ ປະເທດຕົນແມ່ນກຸ່ມເສດຖະກິດທີ່ພັດທະນາເຕີບໂຕໄວກວ່າໝູ່ໃນພາກພື້ນ ແລະ ຫຼາຍອົງການຈັດຕັ້ງສາກົນກໍເຫັນວ່າ ລັດຖະບານປະເທດຕົນມີຄວາມສາມາດ ໃນການຄຸ້ມຄອງເສດຖະກິດມະຫາພາກຢ່າງສົມບູນ ທັງສາມາດຫັນປ່ຽນໂຄງປະກອບເສດຖະກິດປະສົບຜົນສຳເລັດ.