ທ່ານນາງ ເຈນີຊິສເຣໂນສ ເຈົ້າໜ້າທີ່ສຳນັກງານກະຊວງທ່ອງທ່ຽວຟີລິບປິນປະຈຳນະຄອນຫຼວງປັກກິ່ງຢືນຢັນຢູ່ເມືອງຊີ່ອ່ານ ສປ ຈີນເມື່ອມໍ່ໆນີ້ວ່າ: ພ້ອມເປີດຖ້ຽວບິນໂດຍກົງຈາກຊີ່ອ່ານຈີນຫາເມືອງເຊບູຟີລິບປິນໃນໄວໆນີ້.
ນາງເຈນີຊິສເຣໂນສຢືນຢັນວ່າ ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ໄດ້ຊຸກຍູ້ການພັດທະນາຂະແໜງການທ່ອງທ່ຽວ, ຈາກນີ້, ຈິ່ງເຮັດໃຫ້ການພັດທະນາເສັ້ນທາງການບິນລະຫວ່າງຈີນກັບຟີລິບປິນດຳເນີນໄປໄດ້ດີທີ່ສຸດ ທັງໄດ້ສົ່ງເສີມການລົງທຶນໃນໂຄງການທ່ອງທ່ຽວ. ແນວໃດກໍດີຫວັງວ່າ ປີນີ້ຈະມີນັກທ່ອງທ່ຽວຈີນໄປທ່ຽວປະເທດຕົນເຖິງ 1.000.000 ຄົນແລະຈະເນັ້ນນຳສະເໜີແຫຼ່ງທ່ອງທ່ຽວສອງແຫ່ງຄືເຊບູແລະໂບໂຮນ.
ປັດຈຸບັນ, ອາຊີຕາເວັນອອກສຽງໃຕ້ໄດ້ກາຍເປັນເປົ້າໝາຍແຫຼ່ງທ່ອງທ່ຽວທີ່ນັກທ່ອງທ່ຽວຈີນນິຍົມໄປທ່ຽວໂດຍເຫັນໄດ້ໃນແຕ່ລະອາທິດມີ 2700 ຖ້ຽວບິນລະຫວ່າງຈີນກັບບັນດາປະເທດອາຊຽນ.