ວັນທີ 7 ສິງຫານີ້, ທ່ານຫວາງຢີ້ ລັດຖະມົນຕີການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ,ຈີນ,ຍີ່ປຸ່ນແລະສ ເກົາຫຼີຫຼືອາຊຽນບວກ3ຢູ່ນະຄອນຫຼວງມະນີລາປະເທດຟີລິບປິນ.
ທ່ານຫວາງຢີ້ຢືນຢັນວ່າ: ຈີນເປັນຜູ້ມີສ່ວນຮ່ວມຢ່າງຕັ້ງໜ້າແລະຊຸກຍູ້ການຮ່ວມມືອາຊີຕາເວັນອອກຢ່າງສະເໝີຕົ້ນສະເໝີປາຍ. ພາຍໃຕ້ສະພາບລັດທິປົກປ້ອງການຄ້າທີ່ມີທ່າອ່ຽງຟື້ນຂຶ້ນໃນປັດຈຸບັນ, ກົນໄກອາຊຽນບວກ3ຄວນແບກຫາບໜ້າທີ່ສຳຄັນໃນການເປັນຊ່ອງທາງຫຼັກແຫ່ງການຮ່ວມມືໃນອາຊີຕາເວັນອອກໂດຍລົງເລິກການຮ່ວມມືທີ່ແທດເໝາະ ຕົວຈິງໃນ 6 ດ້ານ ເພື່ອ ຊຸກຍູ້ການຮ່ວມມືລະຫວ່າງອາຊຽນບວກ 3 ໃຫ້ຂະຫຍາຍຕົວຂຶ້ນສູງກວ່າເກົ່າ.
ລັດຖະມົນຕີການຕ່າງປະເທດຂອງບັນດາປະເທດໃນອາຊຽນໄດ້ຢືນຢັນຢ່າງເຕັມສ່ວນເຖິງບົດບາດຂອງກົນໄກອາຊຽນບວກ 3 ໃນການເປັນຊ່ອງທາງຫຼັກແຫ່ງການຮ່ວມມືໃນພາກພື້ນ ທັງຕີລາຄາຢ່າງຕັ້ງໜ້າຕໍ່ຜົນສຳເລັດຢ່າງຫຼວງຫຼາຍຂອງການຮ່ວມມືລະຫວ່າງອາຊຽນບວກ 3, ຂະນະດຽວກັນກໍຫວັງວ່າຈີນ,ຍີ່ປຸ່ນແລະສ ເກົາຫຼີຈະສືບຕໍ່ເພີ່ມການລົງທຶນເພື່ອຊ່ວຍອາຊຽນບັນລຸການພັດທະນາແລະຈະເລີນເຕີບໂຕຮ່ວມກັນ ທັງຫວັງວ່າ ກອງປະຊຸມສຸດຍອດອາຊຽນບວກ3ທີ່ຈະຈັດຂຶ້ນຢູ່ນະຄອນຫຼວງມະນີລາໃນເດືອນພະຈິກປີນີ້ຈະໄດ້ຮັບຜົນສຳເລັດຕົວຈິງຫຼາຍກວ່າເກົ່າທັງລົງເລິກການຮ່ວມມືໃນຂົງເຂດເສດຖະກິດ, ການທະນາຄານ, ພື້ນຖານໂຄງລ່າງ, ວັດທະນະທຳແລະອື່ນໆ ທັງຮັບມືກັບໄພຂົ່ມຂູ່ຄວາມໝັ້ນຄົງແບບໃໝ່ເຊັ່ນລັດທິກໍ່ການຮ້າຍໃຫ້ມີປະສິດທິຜົນຫຼາຍກວ່າເກົ່າ.