ວັນທີ 8 ສິງຫານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກເຖິງທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ປະເທດປະທານໝູນວຽນອາຊຽນເພື່ອສະແດງຄວາມຊົມເຊີຍວັນສ້າງຕັ້ງອາຊຽນຄົບຮອບ 50 ປີ. ໂທລະເລກມີເນື້ອໃນວ່າ:
ເນື່ອງໃນໂອກາດອາຊຽນສ້າງຕັ້ງຂຶ້ນຄົບຮອບ 50 ປີ, ຂ້າພະເຈົ້າຂໍຕາງໜ້າລັດຖະບານແລະປະຊາຊົນຈີນ ແລະໃນນາມສ່ວນຕົວ ແລະຜ່ານຈາກທ່ານຂໍສົ່ງຄວາມຊົມເຊີຍລັດຖະບານແລະປະຊາຊົນບັນດາປະເທດອາຊຽນຢ່າງສຸດໃຈ.
ຕະຫຼອດໄລຍະເຄິ່ງສະຕະວັດທີ່ອາຊຽນສ້າງຕັ້ງຂຶ້ນມານີ້, ອາຊຽນໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງແລະສຳເລັດການສ້າງປະຊາຄົມຂຶ້ນ ເຊິ່ງໄດ້ເສີມຂະຫຍາຍບົດບາດສຳຄັນໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ ຈົນໄດ້ກາຍເປັນກຳລັງທີ່ມີລັກສະນະຕົວແທນແງ່ໜຶ່ງໃນຂະບວນການພັດທະນາຫັນເປັນຫຼາຍຂົ້ວຂອງໂລກ. ນະໂອກາດນີ້,ຈີນຂໍອວຍພອນໃຫ້ການສ້າງປະຊາຄົມອາຊຽນຈົ່ງໄດ້ຮັບການພັດທະນາໃໝ່ຫຼາຍຂຶ້ນ ແລະປະກອບສ່ວນສົ່ງເສີມສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນທັງນຳເອົາຄວາມຜາສຸກມາສູ່ປະຊາຊົນບັນດາປະເທດອາຊຽນໃຫ້ຫຼາຍກວ່າເກົ່າ.
ນັບແຕ່ຈີນແລະອາຊຽນສ້າງຕັ້ງສາຍພົວພັນຄູ່ເຈລະຈາເມື່ອປີ 1991ເປັນຕົ້ນມາ, ສອງຝ່າຍໄດ້ເນັ້ນຫົວຂໍ້ການຮ່ວມມືແລະການພັດທະນາ, ຄວາມໄວ້ເນື້ອເຊື່ອໃຈທາງການເມືອງລະຫວ່າງສອງຝ່າຍໄດ້ເພີ່ມທະວີຂຶ້ນເລື້ອຍໆ, ການຮ່ວມມືທີ່ຕິດແທດຕົວຈິງໄດ້ຮັບໝາກຜົນຢ່າງຫຼວງຫຼາຍ. ສາຍພົວພັນຈີນ-ອາຊຽນໄດ້ກາຍເປັນສາຍພົວພັນໜຶ່ງທີ່ມີຊີວິດຊີວາ,ມີເນື້ອຫາອຸດົມສົມບູນກວ່າໝູ່ໃນສາຍພົວພັນລະຫວ່າງອາຊຽນກັບບັນດາຄູ່ເຈລະຈາ.
ຈີນຍິນດີສືບຕໍ່ຍຶດຖືແນວທາງການຕ່າງປະເທດທີ່ມີໄມຕີຈິດມິດຕະພາບແບບສະໜິດສະໜົມ, ມີຄວາມຈິງໃຈ,ຕ່າງຝ່າຍຕ່າງມີຜົນປະໂຫຍດແລະກວມລວມແລະຂໍຖືໂອກາດທີ່ດີທີ່ປີ 2018 ເປັນປີຄົບຮອບ 15 ປີແຫ່ງການສ້າງຕັ້ງສາຍພົວພັນຄູ່ຮ່ວມຍຸດທະສາດຈີນ-ອາຊຽນ, ສ້າງຈຸດຢືນໃນປັດຈຸບັນ, ສຸມສາຍຕາເບິ່ງກວ້າງມອງໄກ,ສ້າງຄູ່ຮ່ວມຊະຕາກຳຈີນ-ອາຊຽນໃຫ້ແໜ້ນແຟ້ນກວ່າເກົ່າເພື່ອໃຫ້ກາຍເປັນໂຕແບບຂອງຄູ່ຮ່ວມຊະຕາກຳອາຊີ.