ລົດທ່ອງທ່ຽວທີ່ບັນທຸກນັກທ່ອງທ່ຽວຈີນຄັນໜຶ່ງໄດ້ເກີດອຸບັດເຫດຂວ້ຳຢູ່ເມືອງປ່າຕອງ ແຂວງພູເກັດປະເທດໄທໃນຕອນຄ່ຳວັນທີ 6 ສິງຫານີ້ ແລະຫຼັງເກີດເຫດ, ສະຖານກົງສຸນໃຫຍ່ຈີນປະຈຳສົງຂາ ແລະ ຫ້ອງການກົງສຸນຈີນປະຈຳພູເກັດກໍໄດ້ສອບຖາມເຈົ້າໜ້າທີ່ທ້ອງຖິ່ນ ແລະພົບວ່າມີນັກທ່ອງທ່ຽວຈີນຢູ່ລົດຄັນດັ່ງກ່າວ 20 ຄົນໄດ້ຮັບບາດເຈັບ ໂດຍສ່ວນຫຼາຍບາດເຈັບເລັກໜ້ອຍ.
ຂ່າວລາຍງານວ່າ: ເວລາປະມານ 20:00 ໂມງຂອງວັນດັ່ງກ່າວ, ລົດທ່ອງທ່ຽວທີ່ບັນທຸກນັກທ່ອງທ່ຽວຈີນ 22 ຄົນລວມທັງພະນັກງານນຳທ່ຽວຊາວຈີນປະຈຳລົດຄັນນີ້ ໄດ້ເກີດເຫດຂວ້ຳ ຂະນະລົງຄ້ອຍຢູ່ກາງທາງທີ່ມຸ່ງໜ້າສູ່ເມືອງປ່າຕອງແຂວງພູເກັດ. ຂະນະທີ່ນັກທ່ອງທ່ຽວ 20 ຄົນຮັບບາດເຈັບນັ້ນ, ປັດຈຸບັນມີໜຶ່ງຄົນຍັງນອນຢູ່ໂຮງໝໍ ແຕ່ບໍ່ມີອັນຕະລາຍເຖິງແກ່ຊີວິດ ແລະອີກ 19 ຄົນໄດ້ກັບຄືນໂຮງແຮມ ຫຼັງຮັບການປິ່ນປົວຢູ່ໂຮງໝໍໃນຕອນຄ່ຳມື້ດຽວກັນ. ປັດຈຸບັນຍັງສືບສວນຫາສາເຫດຂອງເຫດການດັ່ງກ່າວ.
