ເມື່ອມໍ່ໆມານີ້, ເຈົ້າໜ້າທີ່ທະຫານແຂວງຊູມັດຕຣາໃຕ້ແລະແຂວງຈຳບີປະເທດອິນໂດເນເຊຍຕ່າງກໍໄດ້ອອກຄຳສັ່ງວ່າ, ສາມາດຍິງຜູ້ເຈດຕະນາຈູດປ່າໄດ້ເພື່ອສະແດງໃຫ້ເຫັນເຖິງຄວາມຕັດສິນໃຈທີ່ເດັດຂາດຂອງເຈົ້າໜ້າທີ່ເພື່ອຄວບຄຸມໄຟໄໝ້ລາມປ່າ.
ເຈົ້າໜ້າທີ່ອົງການຫຼຸດຜ່ອນໄພພິບັດແຫ່ງຊາດອິນໂດເນເຊຍເປີດເຜີຍວ່າ, ເພື່ອຮັບມືກັບສະພາບໄຟໄໝ້ລາມປ່າແລະຂີ້ຝຸ່ນທີ່ນັບມື້ຮ້າຍແຮງ ຈິ່ງໄດ້ປະກາດໃຫ້ 5 ແຂວງ ຄື ແຂວງຣີອາວ, ຈຳບີ, ຊູມັດຕຣາໃຕ້, ກາລີມັນຕັນຕາເວັນຕົກ ແລະກາລີມັນຕັນຕາເວັນອອກເປັນພື້ນທີ່ພາວະສຸກເສີນ ເຊິ່ງອົງການດັ່ງກ່າວໄດ້ສ້າງຕັ້ງໜ່ວຍຮັບມືໄຟປ່າ ທີ່ມີເຈົ້າໜ້າທີ່ພາກສ່ວນສາທາລະນະສຸກ, ກົດໝາຍ, ວຽກງານສັງຄົມ, ທະຫານແລະຕຳຫຼວດ ລວມທັງອາສາສະໝັກທ້ອງຖິ່ນເຂົ້າຮ່ວມ ເພື່ອປ້ອງກັນ, ຕິດຕາມຄວບຄຸມ ແລະດັບໄຟປ່າ.
ເມື່ອກ້າວເຂົ້າສູ່ລະດູແລ້ງປີນີ້, ອິນໂດເນເຊຍໄດ້ກວດພົບຈຸດໄຟໄໝ້ 300 ບ່ອນ ແລະມີຫຼາຍສິບຄົນ ໃນນີ້ມີເດັກໃນໄວຮຽນ ຕ້ອງໄປປິ່ນປົວຢູ່ໂຮງໝໍຍ້ອນດູດຄວັນແລ້ວພາໃຫ້ເກີດອາການປອດຊຶມເຊື້ອ.
 |
