ວັນທີ 8 ສິງຫານີ້, ດ່ານພາສີຈີນໄດ້ເປີດເຜີຍວ່າ: ເດືອນກໍລະກົດຜ່ານມາ, ຍອດມູນຄ່າການນຳເຂົ້າສົ່ງອອກຂອງຈີນບັນລຸເຖິງ 2320 ຕື້ຢວນຫຼືປະມານ 346 ຕື້ໂດລາສະຫະລັດ ເຊິ່ງເພີ່ມຂຶ້ນ 12,7%ເມື່ອທຽບໃສ່ໄລຍະດຽວກັນຂອງປີຜ່ານມາ. ໃນນີ້, ການສົ່ງອອກເພີ່ມຂຶ້ນ 11,2% ແລະເຖິງວ່າມູນຄ່າການນຳເຂົ້າເພີ່ມຂຶ້ນ 14,7%, ແຕ່ການດຸນການຄ້າກໍໄດ້ເພີ່ມຂຶ້ນ 1,4%. ຈາກນີ້, ທ່ານປາຍມິງ ຮອງຫົວໜ້າພະແນກຄົ້ນຄວ້າຕະຫຼາດສາກົນສະຖາບັນຄົ້ນຄວ້າກະຊວງການຄ້າຈີນຢືນຢັນວ່າ ໂດຍລວມແລ້ວ, ຈັງຫວະການເຕີບໂຕຂອງຍອດມູນຄ່າການຄ້າໃນເດືອນກໍລະກົດຜ່ານມາໄດ້ຫຼຸດລົງໜ້ອຍໜຶ່ງເມື່ອທຽບໃສ່ 6 ເດືອນຕົ້ນປີນີ້ເຊິ່ງເປັນຜົນມາຈາກອັດຕາແລກປ່ຽນເງິນຕາແລະຍອດມູນຄ່າການຄ້າໃນໄລຍະດັ່ງກ່າວນັ້ນເອງ.
ທ່ານປາຍມິງຢືນຢັນຕື່ມວ່າ ເຖິງວ່າການນຳເຂົ້າ-ສົ່ງອອກໃນ 6 ເດືອນຕົ້ນປີນີ້ປາກົດມີທ່າອ່ຽງຂະຫຍາຍຕົວໄປທາງທີ່ດີຢ່າງໜັກແໜ້ນກໍຕາມ, ແຕ່ສ່ວນໃຫຍ່ກໍເປັນການຟື້ນຟູການເຕີບໂຕຢ່າງໝັ້ນທ່ຽງແລະເຖິງວ່າເສດຖະກິດໂລກໄດ້ພັດທະນາດີຂຶ້ນຄືນໃໝ່ກໍຕາມ, ແຕ່ການເພີ່ມຂຶ້ນດ້ານລັດທິປົກປ້ອງການຄ້າສາກົນຈະຕັດໂອກາດການຄ້າໃຫ້ໜ້ອຍລົງຈິ່ງເປັນບັນຫາທີ່ປະໝາດບໍ່ໄດ້.
 |
