ທ່ານຣິຢັດ ອານ ມານກີ ລັດຖະມົນຕີກະຊວງການຕ່າງປະເທດປາແລັສຕິນເປີດເຜີຍວ່າ, ປະເທດຕົນຈະຍື່ນໃບຮ້ອງຂໍຕໍ່ສະພາຄວາມໝັ້ນຄົງອົງການສະຫະປະຊາຊາດອີກເທື່ອໜຶ່ງ ເພື່ອເຂົ້າເປັນສະມາຊິກສົມບູນຂອງອົງການສະຫະປະຊາຊາດ.
ໃນມື້ດຽວກັນ, ຢູ່ຣາມາລາ ຕົວເມືອງຝັ່ງຕາເວັນຕົກແມ່ນ້ຳຈໍແດນ, ທ່ານມານກີໄດ້ພົບປະກັບທ່ານເປີ ໂອເມອູສ໌ ທູດພິເສດສັນຕິພາບຊູແອດແລະໄດ້ຖະແຫຼງວ່າ "ການຂໍເຂົ້າເປັນປະເທດສະມາຊິກສົມບູນຂອງອົງການສະຫະປະຊາຊາດ ເປັນເລື່ອງທີ່ພວກເຮົາຈະຍຶດໝັ້ນໂດຍບໍ່ປ່ຽນແປງ."
ທ່ານມາມຸດ ອັບບາສ໌ ຜູ້ນຳປາແລັສຕິນໄດ້ຍື່ນໃບຮ້ອງຂໍເຂົ້າເປັນປະເທດສະມາຊິກສົມບູນຂອງອົງການສະຫະປະຊາຊາດຕໍ່ທ່ານບັນກີມູນ ອະດີດເລຂາທິການໃຫຍ່ອົງການສະຫະປະຊາຊາດເມື່ອເດືອນກັນຍາປີ 2011, ແຕ່ສະພາຄວາມໝັ້ນຄົງບໍ່ຮັບຮອງ. ຂະນະທີ່ວັນທີ 29 ພະຈິກປີ 2012, ສະມັດຊາໃຫຍ່ອົງການສະຫະປະຊາຊາດສະໄໝທີ 67 ໄດ້ຮັບຮອງເອົາມະຕິໃຫ້ປາແລັສຕິນກາຍເປັນປະເທດສັງເກດການຂອງອົງການສະຫະປະຊາຊາດ.
 |
