ພິທີຖະແຫຼງຂ່າວງານວາງສະແດງການປະຢັດພະລັງງານແລະລົດໃຊ້ພະລັງງານໃໝ່ສາກົນ 2017 ທີ່ຈັດຂຶ້ນຢູ່ເມືອງເຫີເຝີຍ ແຂວງອ່ານຮຸ່ຍ ສປ ຈີນເມື່ອມໍ່ໆນີ້ເປີດເຜີຍວ່າ: ປີ 2016 ຜ່ານມາ, ປະລິມານການຈຳໜ່າຍລົດໃຊ້ພະລັງງານໃໝ່ຂອງຈີນບັນລຸເຖິງ 5 ແສນ 7000 ຄັນ ເຊິ່ງຄອງອັນດັບໜຶ່ງໃນໂລກເປັນ 2 ປີຕິດຕໍ່ກັນ.
ໂດຍໄດ້ຜົນມາຈາກການພັດທະນາຢ່າງວ່ອງໄວຂອງຂະແໜງການລົດໃຊ້ພະລັງງານໄຟຟ້າ, ຈີນກໍໄດ້ເລັ່ງລົງທຶນກໍ່ສ້າງອຸປະກອນສາກໄຟເຊັ່ນກັນ. ອົງການພະລັງງານແຫ່ງຊາດຈີນເປີດເຜີຍວ່າ: ມາຮອດທ້າຍເດືອນເມສາປີນີ້, ທົ່ວປະເທດໄດ້ສຳເລັດການສ້າງປ້ອມສາກໄຟສາທາລະນະ 1 ແສນ 7 ໝື່ນ 1000 ເຄື່ອງ.
ປັດຈຸບັນ, ນະຄອນຫຼວງປັກກິ່ງ,ຊຽງໄຮ,ເສິນເຈີ້ນແລະຕົວເມືອງອື່ນໆຕ່າງກໍໄດ້ສ້າງຕັ້ງອົງການຄຸ້ມຄອງການດຳເນີນທຸລະກິດຂອງພື້ນຖານໂຄງລ່າງສາກໄຟຂອງເມືອງຕົນ,ຂະນະທີ່ສະມາຄົມຂະແໜງການລະດັບຊາດແລະທ້ອງຖິ່ນກໍໄດ້ສ້າງຕັ້ງຂຶ້ນທັງເສີມຂະຫຍາຍບົດບາດທີ່ຕັ້ງໜ້າ.