ຢູ່ທີ່ກອງປະຊຸມມິດຕະພາບລະຫວ່າງປະຊາຊົນຈີນ-ອາຊຽນຄັ້ງທີ 11 ທີ່ຈັດຂຶ້ນຢູ່ກຳປູເຈຍໃນວັນທີ 8 ສິງຫານີ້, ສະມາຄົມມິດຕະພາບກຳປູເຈຍຈີນແລະສະມາຄົມມິດຕະພາບຕໍ່ຕ່າງປະເທດປະຊາຊົນນະຄອນຈຸ່ງກິ່ງຈີນໄດ້ລົງນາມໃນສັນຍາວ່າດ້ວຍການແລກປ່ຽນມິດຕະພາບເພື່ອກຳນົດທິດທາງການຮ່ວມມືແລະການແລກປ່ຽນໃນຕໍ່ໜ້າ.
ທ່ານເອັກຊຳອອຍ ປະທານສະມາຄົມມິດຕະພາບກຳປູເຈຍຈີນຢືນຢັນໂດຍຫວັງໃຫ້ສອງຝ່າຍຖືໂອກາດການສ້າງ "ໜຶ່ງແລວທາງໜຶ່ງເສັ້ນທາງ"ເພື່ອລົງເລິກການພົວພັນຮ່ວມມືລະຫວ່າງກຳປູເຈຍກັບນະຄອນຈຸ່ງກິ່ງ ແລະສົ່ງເສີມການເປີດເສັ້ນທາງການບິນໂດຍກົງລະຫວ່າງຊຽມລຽບ-ຈຸ່ງກິ່ງເພື່ອຳນວຍຄວາມສະດວກໃຫ້ແກ່ນັກທ່ອງທ່ຽວຈຸ່ງກິ່ງໄປທ່ຽວຊຽມລຽບ. ຂະນະດຽວກັນກໍຫວັງວ່ານັກທຸລະກິດຈຸ່ງກິ່ງມາລົງທຶນຢູ່ປະເທດຕົນເພື່ອຊຸກຍູ້ການພັດທະນາເສດຖະກິດ ແລະສະມາຄົມມິດຕະພາບກຳປູເຈຍຈີນຍິນດີເສີມຂະຫຍາຍບົດບາດທີ່ຕັ້ງໜ້າເພື່ອການຮ່ວມມືໃນຂົງເຂດຕ່າງໆລະຫວ່າງກຳປູເຈຍແລະຈຸ່ງກິ່ງ.
ທ່ານໂຈ່ວຈື້ກ່າງ ຫົວໜ້າສະມາຄົມມິດຕະພາບຕໍ່ຕ່າງປະເທດປະຊາຊົນນະຄອນຈຸ່ງກິ່ງຢືນຢັນວ່າ ສະມາຄົມຕົນຈະຮ່ວມກັບສະມາຄົມມິດຕະພາບກຳປູເຈຍຈີນເພື່ອປະກອບສ່ວນເຂົ້າໃນການຮ່ວມມືສອງຝ່າຍໃນດ້ານວັດທະນະທຳ,ເສດຖະກິດ,ທ່ອງທ່ຽວ,ຊາວໜຸ່ມແລະອື່ນໆ.
 |
