ຫວ່າງບໍ່ດົນມານີ້, ຫ້ອງການຫຼຸດຜ່ອນຄວາມທຸກຍາກລັດຖະບານ ແລະ ຄະນະກຳມະການສາທາລະນະສຸກ ແລະ ແຜນການຄອບຄົວແຫ່ງຊາດຈີນ ໄດ້ຮ່ວມກັນເຜີຍແຜ່ "ແຜນວຽກໃນໂຄງການຫຼຸດຜ່ອນຄວາມທຸກຍາກດ້ວຍແສງສະຫວ່າງ" ເພື່ອຮັບປະກັນການບັນລຸຊີວິດການເປັນຢູ່ທີ່ອີ່ມໜຳສຳລານຢ່າງຮອບດ້ານ. ແຜນວຽກດັ່ງກ່າວໄດ້ລະບຸວ່າ: ນັບແຕ່ປີນີ້ເປັນຕົ້ນໄປ, ຈະປິ່ນປົວຜູ້ເປັນແກ່ນຕາຂຸ້ນທີ່ທຸກຍາກແລະໄດ້ຂຶ້ນທະບຽນນັ້ນ ໂດຍບໍ່ເກັບຄ່າ ເພື່ອເຮັດໃຫ້ຮອດປີ 2020 ຈະເຮັດໃຫ້ຜູ້ເຈັບເປັນທີ່ໄດ້ຂຶ້ນທະບຽນໄວ້ນັ້ນໄດ້ຮັບການກວດແລະປິ່ນປົວທຸກຄົນ ທັງຈະສ້າງກົນໄກທີ່ມີປະສິດທິຜົນໃນໄລຍະຍາວນານ.
ເຈົ້າໜ້າທີ່ຄະນະກຳມະການສາທາລະນະສຸກ ແລະ ແຜນການຄອບຄົວແຫ່ງຊາດຈີນ ໄດ້ໃຫ້ຮູ້ວ່າ: ພະຍາດແກ່ນຕາຂຸ້ນຍັງຄົງແມ່ນສາເຫດອັນດັບໜຶ່ງທີ່ພາໃຫ້ເກີດຕາບອດຢູ່ປະເທດຕົນ, ຂະນະທີ່ການປິ່ນປົວຜູ້ເປັນແກ່ນຕາຂຸ້ນທີ່ທຸກຍາກຢູ່ຊົນນະບົດ ແມ່ນມາດຕະການສຳຄັນໃນການຊຸກຍູ້ວຽກງານປ້ອງກັນ ແລະ ປິ່ນປົວຕາບອດ ພ້ອມທັງຮັບປະກັນໃຫ້ຜູ້ທຸກຍາກຢູ່ຊົນນະບົດຫຼຸດພົ້ນອອກຈາກຄວາມທຸກຍາກເມື່ອຮອດປີ 2020.