ປະຊາຊົນເມືອງຊິງຈູ ແລະເມືອງກິມເຊນ ພ້ອມດ້ວຍ 6 ຄະນະໃຫຍ່ຕໍ່ຕ້ານການຕິດຕັ້ງລະບົບຕ້ານຂີປະນາວຸດ "ທາດ" ໄດ້ຈັດພິທີຖະແຫຼງຂ່າວຢູ່ໃກ້ສະຖານທີ່ຕິດຕັ້ງລະບົບ "ທາດ" ເມືອງຊິງຈູ ແຂວງກິງຊາງເໜືອປະເທດ ສ.ເກົາຫຼີ ໃນວັນທີ 10 ສິງຫານີ້ ໂດຍຄັດຄ້ານລັດຖະບານປະເທດຕົນທີ່ຈະກວດກາຄື້ນແມ່ເຫຼັກໄຟຟ້າຖານຕິດຕັ້ງລະບົບ "ທາດ" ເມືອງຊິງຈູ ໃນວັນດັ່ງກ່າວ ແລະຈາກການຄັດຄ້ານຢ່າງຮຸນແຮງຂອງປະຊາຊົນທ້ອງຖິ່ນ ແລະ ຄະນະຈັດຕັ້ງຊາວເມືອງຕ່າງໆ, ການກວດກາຄື້ນແມ່ເຫຼັກໄຟຟ້າເທື່ອນີ້ຈຶ່ງຖືກໂຈະໄວ້.
ຜູ້ຄັດຄ້ານລະບົບ "ທາດ" ຊີ້ວ່າ: ການກວດກາຄື້ນແມ່ເຫຼັກໄຟຟ້າທີ່ລັດຖະບານປະເທດຕົນຈະດຳເນີນນັ້ນ ກໍເພື່ອເຮັດໃຫ້ການປະເມີນຜົນກະທົບຕໍ່ສິ່ງແວດລ້ອມໃນບໍລິເວນນ້ອຍຊອບດ້ວຍກົດໝາຍ ສະນັ້ນຈຶ່ງສະແດງທ່າທີຄັດຄ້ານຢ່າງຮຸນແຮງ. ພ້ອມກັນນັ້ນ ກໍໄດ້ 4 ຂໍ້ສະເໜີຕໍ່ລັດຖະບານ ຄື ໜຶ່ງ, ລັດຖະບານຕ້ອງຢຸດການປະເມີນຜົນກະທົບຕໍ່ສິ່ງແວດລ້ອມໃນບໍລິເວນນ້ອຍນັ້ນທັນທີ; ສອງ, ຢຸດການນຳໃຊ້ລະບົບ "ທາດ" ທັນທີ ແລະ ຮື້ຖອນລະບົບດັ່ງກ່າວອອກຈາກປະເທດ; ສາມ, ຢຸດການດຳເນີນງານທີ່ກ່ຽວຂ້ອງໃນການຕິດຕັ້ງລະບົບດັ່ງກ່າວ ແລະ ດຳເນີນການປະເມີນຜົນກະທົບຕໍ່ສະພາບແວດລ້ອມທາງຍຸດທະສາດ ຫຼັງຖອນລະບົບດັ່ງກ່າວອອກໄປ ແລະສີ່, ສືບສວນ-ສອບສວນຂະບວນການຕິດຕັ້ງລະບົບ "ທາດ" ທີ່ຜິດກົດໝາຍຢ່າງຮອບດ້ານ ທັງລົງໂທດຜູ້ຮັບຜິດຊອບຢ່າງເຂັ້ມງວດ.