ໜັງສືພິມ "ມະນີລາບູເລຕິນ" ຂອງຟິລິບປິນ ລາຍງານວ່າ: ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ຮຽກຮ້ອງຂະນະປາໄສໃນພິທີປິດບັນດາກອງປະຊຸມລັດຖະມົນຕີກະຊວງການຕ່າງປະເທດອາຊຽນຫວ່າງມໍ່ໆມານີ້ວ່າ: ບັນດາຝ່າຍທີ່ມີຜົນປະໂຫຍດຮ່ວມກັນຄວນເລັ່ງຊຸກຍູ້ ແລະ ເຊັນສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RECP ໂດຍໄວ ເພື່ອຮ່ວມກັນຊຸກຍູ້ການເຕີບໂຕແບບກວມລວມໃນພາກພື້ນ ພ້ອມທັງຕໍ່ຕ້ານລັດທິປົກປ້ອງການຄ້າ.
ທ່ານດູເຕີເຕ ກ່າວວ່າ: ບັນດາປະເທດໃນອາຊຽນຄວນປະເຊີນກັບສະພາບເສດຖະກິດໂລກາພິວັດໃນປັດຈຸບັນໃຫ້ຖືກເປົ້າ ໂດຍບໍ່ຄວນຖືເອົາຄວາມສຸກເປັນສິດຂອງຄົນຈຳນວນໜ້ອຍເທົ່ານັ້ນ, ຫາກເປັນຂອງທຸກຄົນໃນຊີວິດຂອງຕົນ. ບັນດາປະເທດໃນອາຊຽນຄວນໄດ້ຮັບຜົນປະໂຫຍດໃຫຍ່ຫຼວງກວ່າເກົ່າໃນດ້ານການຄ້າເສລີ ແລະ ຄັດຄ້ານລັດທິປົກປ້ອງການຄ້າ ສະນັ້ນ, ຝ່າຍຕ່າງໆຄວນສະໜັບສະໜູນການເຈລະຈາ RECP ທີ່ລິເລີ່ມການເຕີບໂຕແບບກວມລວມ ທັງພິຈາລະນາເຖິງສະພາບຄວາມເປັນຈິງຂອງບັນດາປະເທດ ແລະພະຍາຍາມໃຫ້ບັນລຸການເຊັນສັນຍາດັ່ງກ່າວກ່ອນທ້າຍປີນີ້.
